資深演員夏萍上周一離世，享年81歲。她在1955年入行，歷來作品無數，最令人印象深刻是在電影《九品芝麻官》中飾演周星馳的母親，手持鹹魚當尚方寶劍。晚年因中風入住老人院，由契仔林家棟照顧。林家棟透露契媽離世時女兒及孫兒都在旁，他說：「契媽去得安詳。」並已安排下周一（19日）替契媽設靈。
相關新聞：【兩段婚姻】參演逾200部電影
夏萍在行內被稱為「Apple姐」，她上周一在醫院因病離世，享年81歲。契仔林家棟昨日接受電話訪問，證實契媽死訊，他說：「佢喺5號離開咗，喺醫院離開，因為佢之前住喺老人院時，得到幾嚴重嘅中風，本身佢身體麻麻哋，血壓高又糖尿病，醫生都解釋過醫嗰方面比較困難，但係都盡力，佢留院差唔多兩、三個禮拜先離開。」
 【去年嘆茶】去年夏萍在葵涌午膳，精神不俗。 | |
喪禮採佛教儀式
林家棟指夏萍彌留時，家人一直陪伴在側，他說：「舒服地離開，醫生都話以佢哋專業角度盡量幫佢做，佢去得好安詳，我都即刻聯絡晒佢啲屋企人，大部份到齊，因為有啲唔喺香港。佢個女同啲孫都喺度，睇住佢走，覺得係一個解決，始終你知老人插住條喉去呼吸係chok得好辛苦，佢最後一口氣都係舒服。」他表示契媽生前喜歡聽經文，所以喪禮會採用佛教儀式：「我同演藝人協會商量咗，19號設靈，已經安排好晒，佢鍾意聽經，所以用佛教儀式送佢。」問到他會否披麻戴孝時，他續道：「我要去現場先知，佢屋企人有啲係信基督教，我就同佢哋強調契媽生前好鍾意聽經，譬如觀音經嗰啲，我會尊重佢老人家，覺得佛教比較合適，佢屋企人都唔反對，冇乜所謂，最重要係老人舒服。」
相關新聞：【金牌綠葉】演錢嘉樂外婆爭女配
15年曾跌倒受傷
演藝人協會會長古天樂日前已得悉夏萍姐離世，他表示演藝人協會將會提供協助：「我哋協會已經同佢家人聯絡咗，初步了解過喪禮嘅安排，如果夏萍姐家人有任何需要幫忙，協會會盡量幫手，夏萍姐係一個出色演員，佢嘅離開，當然係演藝界嘅損失。」
夏萍自從2015年在九龍灣家中不慎跌倒受傷，便退出幕前，一直深居簡出，《末代御醫》和《城寨英雄》成為她最後的螢幕作品。她在《九品芝麻官》中演周星馳的失智母親，以鹹魚當尚方寶劍及兩度演錢嘉樂外婆，最令人津津樂道。出院後她由家人及契仔林家棟安排專人照顧，三年前安排入住葵涌區老人院。去年有本報讀者分享夏萍在葵涌與女友人在茶餐廳食午飯情況，當時夏萍要以輪椅出入，但臉頰豐滿且精神飽滿，相當精靈。食飯期間她全程自己進食，食兩啖又與朋友聊天，精神相當不俗。
採訪︰鍾國仁、何永寧
|
鍾意就快D Share啦！
|
|
|
