一部出色的科幻小說，就好比近未來（Near Future）的預言書。倪匡32年前曾以筆下《追龍》，準確道出香港移交中共後必定衰亡，強調不過是建基於常識的分析。在反送中運動席捲全港的今天，智慧老人再次出山，讚揚百萬人和平示威是世界奇蹟，批評香港警察只敢對示威者「勇武」已淪極權工具。身為反共先鋒，他坦言港人長期目睹中共種種醜態，但今次厭共情緒之烈仍在他意料之外，認為要翻身作主先要有革命的準備，但又憂慮在暴力鎮壓陰霾下抗爭持續升級恐造成無謂傷亡。不過說到底，他依舊站在弱勢一方：「我反共反咗幾廿年唔通而家去撐警啊？」
記者 佘錦洪
「其實送中條例根本係多餘㗎嘛，你（共產黨）喺香港派幾個特務落嚟，咩人都捉得返去，肖建華都捉得返去仲有咩人捉唔返？」以半鹹淡廣東話說出一針見血的見解，要聽懂倪匡的「倪腔」，往往需要左右腦並用，創意與理智缺一不可。但這位看透世情的人物，說起6月至今的反送中運動，語氣中帶有一絲由衷佩服，「（超過）100萬人上街，呢啲係世界奇蹟嚟㗎嘛，自從有人類歷史以嚟未試過有人為咗反對一件事有咁多人遊行。」
也許是經歷過專制與自由兩種極端生活，在倪匡眼中，香港人文明而和平的遊行，自有一種力量使暴政低頭，「你百幾萬人遊行非但佢恐懼，全世界都震驚，『點可以有咁多人』，你鏡頭望落去得人驚㗎嘛」，認為接連兩場百萬人級大遊行，是促成港府一再退讓的主要原因之一，亦會令警察畏懼，「你一兩百萬示威者差人冇動作啦，佢可能有咩動作？佢3萬警察全部出動都冇辦法。」誠然，在兩次大遊行期間，以「克制」著稱的香港警隊皆自動失蹤，而近日多次亂射催淚彈清場，亦每每發生在入夜後示威者陸續散去之時。
催淚彈放題、無舉旗開槍、涉警黑合作等，警隊形象於這場政治運動中幾近徹底破產。倪匡指出，在文明自由社會中，警察與民眾本應是「自己人」，但現時香港正退化成一個極權統治社會，「警察同民眾冇可能關係好，因為根據列寧嘅講法，國家統治機器警察係主要力量，點可能同民眾有好關係呢？」他直言無方法重建市民對警察信心，但認為如果警察相信自己無錯，何不順應民意成立獨立調查委員會，「如果我無做壞事，我一定歡迎㗎嘛。話會打擊警察士氣，你未調查肯定查出嚟係差人唔啱啦咩？或者差人冇唔啱呢查咗，你還人哋一個真相吖嘛。」
問到是否認同警察已經失控，他回答簡單而直接，「紀律部隊嚟喎，佢一定有訓練，問題係訓練佢係邊啲人、用咩方法訓練、灌輸啲咩觀念，我哋完全唔知」，但認為有網民發起聯署要求定義香港警察為恐怖組織是言之過早，「我諗要共產黨全面接管改組警察部門之後，咁就可以定義啦。」再厚面皮問倪匡對警隊的評價，得到的竟是「勇武」二字，他笑言：「勇武咪對付示威者幾勇武啊，需要佢嗰時唔見㗎，唔需要佢嗰時嗱嗱聲衝出嚟。佢衝出嚟我喺電視見到，冇乜示威者啦，唔使咁大陣仗。」
觸發整場運動最核心的問題，倪匡認為是香港根本不存在「一國兩制」，「當年我就話呢個完全係西藏17條翻版嚟㗎嘛，即係姑爺仔氹女仔，氹嗰時好話講盡，氹咗之後賣咗你去南洋做雞」，現時特首林鄭月娥不過是傀儡，中國共產黨已逐步掌控香港，「唔好50年不變啦，過去廿幾年都已經變到唔清唔楚」，但偏偏香港臨近中國，見證中共建國70年以來種種醜態，除非主動出賣良知換取利益，否則斷然無法接受香港投入極權之中，「你叫香港人相信自己經歷嘅嘢，定係相信你嘅宣傳吖？」
但兩個月以來民間五大訴求遲遲未得到回應，警方與示威者行動亦在多次糾纏中不斷升級。倪匡感嘆示威者無集中領導仍可與政權堅持對抗，「香港人厭共嘅情緒出乎我意料之外，個個都似我咁厭共，仲厭過我」，但運動陷入僵持亦是因為無集中領導，是「勇武有餘，考慮不足」，貿貿然從和平升級到衝擊，可惜了大好局面，「100萬人200萬人大家都冇人提啦，反而大家喺處提暴力，畀呢個當政者一個好好轉移視線機會，呢個係中國古語叫 『授人以柄』」。
倪匡引用法國及巴基斯坦等地示威衝突作例子，認為現時香港示威者所使用的武力僅屬「小兒科」級數，「你竹枝啊、出棍啊，點都打唔過催淚彈同埋子彈槍」，無論是衝擊立法會或是中聯辦塗污國徽，對中共政權都是不痛不癢，「塗污國徽雖然痛快，但係作用唔大，佢咪即刻換過一隻囉」，同時又不忘嘲諷中聯辦內的共產黨員辦事不力，「呢個國家尊嚴國家主權，點解你唔出嚟保護啊？唔好話油漆彈，機關槍你都要擋住啦。」
他續指在現行局勢中，香港反共力量終有一天會消亡，或會與新疆同一下場，「用對付新疆人嘅辦法，整個集中營，整去邊度呢？整去大嶼山，大嶼山填海唔知係唔係會整個集中營？」說着搖頭苦笑。他又提醒不要期望中美貿易戰會是助力，皆因中國人千年來已習慣專制統治，百姓再苦也難以動搖政權，「中國人13億食草都可以生存落去，你美國人得唔得啊？文化大革命嗰陣時咁苦都捱過，大饑荒咁苦都捱過嚟啦，唔怕㗎嘛。你特朗普有幾多年啫？畀你再連任4年，至多6年，捱過6年容乜易啫，你都玩完啦。」
要擺脫困局，倪匡指前面有三條路。其一是學會順從做奴民，「香港人如果要乖乖聽話早就聽咗啦，唔會有呢次事啦」，最消極的是離開香港，剩下一條是最積極、但亦是最渺茫：「就係勇武抗爭不怕犧牲排除萬難囉。」
倪匡指「香港獨立」雖好，但現在情況下只能停留在夢想裏，因為雙方武力差距太大，「你玩唔玩啤（牌）㗎？你初初用竹竿，你係二一對。而家你有頭盔啦，三一對。就算你有機關槍啦，你都係Q一對、J一對，你始終打唔過ACE一對㗎嘛。佢有原子彈、有核武器、有火箭部隊，你點同佢鬥呢？無可能㗎鬥唔過佢。」他舉例清末政治腐敗、軍隊武力薄弱，國父孫中山搞革命亦要流血犧性、歷時十多年才成功，「你又冇辦法好似法國大革命咁進一步，百幾萬人攻入去，如果百幾萬人一齊去作反，共產黨都冇行啊，殺晒你百幾萬人咩，問題係香港冇可能有百幾萬出嚟作反。」
兜兜轉轉，矛頭還是指向到底會否出動解放軍的問題。從現在的形勢考慮，倪匡認為即使共產黨決定出解放軍鎮壓，也不會光明正大，皆因香港尚有僅餘的利用價值，「瑞士銀行公佈100個中國人780億（人民幣）存款啊。從北京匯出去啊？匯唔出㗎嘛，梗係通過香港出去。」
個多小時訪談，倪匡未有總結出一個拆局對策，但智者千慮或者終有一失，他對香港未來亦只說是「死咗九成」，尤其指在法律及教育兩個界別，依然是香港自由與文明的堡壘。
網上有所謂「核爆都不割席」，最後問到他是否還站在抗爭者一方，他回答得毫不猶豫：「當然啦，我反共反咗幾廿年唔通而家去撐警啊？」
-----------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
| 《蘋果》製圖。原圖謝榮耀攝 | | |
|
鍾意就快D Share啦！
|
|
|
