近年譚小環多了個外號叫「魚蛋皇后」，這粒魚蛋沒有甚麼革命，只想「渣哥」可以遍地開花；現實是，小店難敵貴租，舖位已經由6變3，但當初開店的初心，始終如一。
譚小環說：「舖租又貴啦、食材又貴啦，我哋唔想將啲價錢加喺市民身上呀！」
每次看她們店子的面書專頁都令人覺得很療癒，封面圖片上那句「同熱愛這老口味」已經充滿香港味，每日出帖更加緊貼時勢，例如最新的「細路，唔好餓壞身體」的免費食券；之前有每日自動「壽終正寢」的外賣飯盒……
老闆娘小環說：「希望可以調劑吓𠵱家緊張嘅香港生活」第一波的罷市行動，小環舖頭已率先響應；遊行途中亦總會見到小環兩公婆的身影。
被稱為良心小店，譚小環說：「我哋只係做咗我哋要做嘅嘢！」不用說太多，行動最實際。
撰文：文嘉龍
攝影：沈健程
供「我愛香港」免費餐
早在6.12的第一波罷市，小環舖頭率先行動支持，輪到今次8.5三罷，魚蛋店決定「門照開」，亦會繼續提供「我愛香港」免費套餐，請食腸粉撐真．細路。「渣哥」面書前晚出post，回應8.5大罷工的安排：「罷工唔開，又怕有熱血細路肚餓冇嘢食，想繼續提供「我愛香港」免費套餐；因為我哋覺得，每個人都有不同嘅崗位，有人負責救火，有人負責拎水，有人負責急救，咁我哋嗰三間舖，係應該做最後嘅食物支援。雖然都唔係話幫到好多，但好似人人出少少力，就可能推動到少少，希望大家唔好覺得我哋好儍，亦唔好介意我哋出嘅力唔係好大。」
「渣哥」的hashtag真係好正，例如#好人大人細路都一世平安；#想蝦渣哥你問過真香港人未；#超正香港人總有你鼓勵，還有#遍地開渣，管理員小編當然不會被老闆怒炒，因為好多時老闆（小環老公）都會親身出鏡又出po！「我哋比較生活化，唔想咁悶，變咗有時見到一啲比較得意嘅金句，我哋就會post上去，希望可以調劑吓𠵱家緊張嘅香港生活啦，大家笑吓輕鬆吓，唔好成日咁繃緊！」
迎難而上，事實是這幾年經營小店都是艱辛時刻，「呢幾年都不斷辛苦經營緊，我哋又想啲員工有一個好啲嘅福利，亦唔想定到個價錢咁高，一加價即係市民又要畀多啲，但係點樣先可以平衡到呢？平衡唔到㗎喎，租又會加你啦，入貨嘅成本又不斷加，如果唔係轉介落買嘢嘅市民度，我哋何來維持生意呢？兩年加一次價，我哋都要開晒會投票睇吓加唔加好……呢幾年都係艱難㗎，冇一刻輕鬆過。」
譚小環的母親是賣睡衣的小販，她自細陪住母親開檔，如今自己開檔賣魚蛋，她回想14年在銅鑼灣開第一間舖，初心就是要尋回兒時香港的味道。「我開呢間小食店嘅初衷，其實係想搵番我小時候食小食，香港人大家好開心喺條街度，買魚蛋燒賣腸粉，嗰段最開心嘅時刻。我媽咪係小販，我細細個同佢一齊賣嘢（睡衣），我細個見到隔籬啲檔係炒腸粉賣豆漿，呢啲係我兒時回憶，我好想將呢一份回憶帶返畀𠵱家嘅年輕人！」
可惜最近香港的味道似乎不太對味，「我諗唔好逼到自己個情緒咁緊，有好多嘢唔係我哋香港人可以做到，我亦都唔想太多嘅負面情緒充斥住香港人，我希望盡量輕鬆吓，喺適當時候能夠畀到自己一個休息，個腦部要休息、身體要休息，令到自己強起嚟，生活先至可以繼續落去㗎嘛！」
唔少網民都留言說是良心小店，老闆娘說：「香港都有好多良心小店嘅，我哋只係做咗我哋要做嘅嘢！」
十二年入面一定有危機
小店要艱苦經營，譚小環兩公婆這幾年都有自身問題要面對。兩年前，小環老公蔡強榮（Eric）患上肺癌一期，可幸發現得早，立即切除右邊上下肺葉的一半，不用經歷電療、化療之苦。
「其實佢嘅病亦都提醒咗我自己，咦，年紀有番咁上下，都要顧吓自己嘅身體健康。以往嘅我係唔運動，可能大家都覺得我好瘦，其實我膽固醇係幾高……尤其是我老公啦，𠵱家呢方面（飲食）我畀咗好多壓力佢，佢話不如睇得鬆啲啦，我話唔得呀，起碼呢幾年喺我監察之中你要食乜食乜，我都要睇得好緊。」
老公的多年煙癮，話戒就戒，「煙係佢自己話要戒。以前佢食煙，我會話戒咗佢啦，到佢發現咗有呢個病嘅時候，我唔想再加重佢壓力，我就唔出聲，只係諗辦法點樣去醫好個病先；反而係佢自己講話唔再食，將袋口嗰包煙攞出嚟，到𠵱家都冇話要再食。佢早幾個月仲幫醫生做咗個記者會，佢做咗戒煙大使！」
譚小環說，因為老公這一場大病，令到兩夫妻更加齊心面對難關，「更加深入了解多咗，變咗我哋已經係不可分割，去到另一個層次囉。」
07年結婚至今，當然經歷過婚姻危機。任職保險公司區域總監的蔡強榮，曾流出過在夜場咀女相片，不過風雨過後再加上大病一場，兩夫妻感情更勝從前。「十二年入面一定係有危機，個危機係大定係細啫！我幾享受𠵱家嗰個生活模式，就係有乜嘢就講，有啲乜係可以唔講呢？連上次佢病咁大件事都經歷過，我覺得冇乜嘢可以瞞住大家囉，我覺得係坦承去傾，係我哋目前兩夫妻嘅相處之道。」
46歲的譚小環說好早已經決定婚後不會生小朋友，「我先生係鍾意小朋友嘅，但係到近呢五年，佢會覺得其實冇小朋友都係一個幾好嘅決定，所以我哋就養咗狗仔，我哋都有小朋友㗎，佢就係LaLa，LaLa就係我哋一隻細嘅貴婦狗。佢（老公）都睇化咗好多嘢，現今咁嘅時勢，小朋友係要開心、無憂無慮咁去生活，但係暫時嚟講，佢睇唔到𠵱家呢個社會可以無憂無慮咁好開心去生活囉！」
我冇乜資格開聲講怨
自家小店賣香港人的味道，94年港姐冠軍出身的譚小環，當年的香港小姐，也確實能代表香港。2011年拍完《法證先鋒III》後離開娘家，早前劇集剛巧重播，小環說諗起都笑死，當年要做胡楓的小三。
雖說早已轉戰飲食業，但小環仍然有顆演藝之心，「我都仲係好享受做我嘅演藝事業㗎，睇吓會唔會再遇到一啲好角色，好似我舊年都有客串一啲電影（《洩密者們》），ViuTV有時都會問我有冇興趣去飾演呢個角色呀！我𠵱家接劇集就好睇角色對手，同埋時間許唔許可，如果啱啱嗰個時候係我籌備緊開新舖，咁真係唔好意思喇！」
在無綫多年，有否覺得自己際遇不夠好？「演藝事業就係咁，要好夾你嘅timing、你嘅際遇，你有冇遇到個好嘅角色畀你。我覺得喺電視台有好多前輩佢哋默默耕耘咗好多年，都仲未爆紅，但係佢哋都仲係好熱衷去做一個綠葉嘅角色，反而我好欣賞佢哋嘅EQ；對於我嚟講，我喺電視台十幾年，相比起佢哋嗰個年資，差天共地呀，我覺得我冇乜資格開聲講怨，佢哋咁多年都仲未紅，我反而係戥佢哋唔抵囉！」
她在圈中到現在仍然keep到友誼的，都是一些甘草綠葉輩，「其中一個就係Madam盧宛茵，以前我哋拍劇要出埠，我哋都會一齊去食飯，Madam最鍾意去酒店聽吓啲Jazz，好識得享受人生；另外一個就係鋒哥郭鋒，我會成日約佢打羽毛球；仲有一個就係蔣志光，佢跑馬拉松呢，我係見證住佢由練習男到好勁，我諗佢𠵱家可以做教練，跑全馬對佢已經毫無難度。」
離開無綫，才有機會發展另一事業，「拍埋呢個劇（《法證先鋒III》），我連主持（《都市閒情》）都唔做，諗住畀自己休息吓，畀一段時間留畀屋企，而我喺屋企呢一段時間，我又增值一吓自己，我去學啲手工藝，我會唔會有一啲嘢適合我呢？因為我選美完之後，我21歲之後就冇接觸其他行業，好似同呢個社會脫咗節，我想畀個機會自己趁仲係後生，有多啲嘢可以試吓。」
點睇𠵱家嘅無綫呢？「因為我好少睇電視，同埋我都離開咗好多年喇，可能𠵱家個運作模式同我嗰時好唔同，以前已經係過去式。」以往做過《勁歌金曲》和《都市閒情》主持的譚小環，她卻說：「如果有得畀我揀，我鍾意拍戲，可以試吓我生活中做唔到嘅嘢，喺戲裏面彌補咗我個願望。」
幾時都話，有得揀先至係老闆。
【後記】羅記
說起主持過《勁歌金曲》，其實譚小環仲做過歌星出過唱片，講到唱歌呢瓣，小環當堂大笑，「哈哈哈哈，我𠵱家聽返我自己啲歌聲，我都覺得好笑呀，好似小朋友喺度唱歌咁，真係得啖笑！」
還有和鄭伊健合唱的《如果天空要下雨》，「𠵱家都成日唱嚟笑我，《如果天空要下雨》同埋我隻《被愛》，有啲fans都喺facebook留言，成日提返呢兩首歌，我又覺得自己好好笑，始終嗰時把聲好似雞仔聲。」
可能好多人不記得，譚小環是羅文徒弟之一。關於師父的回憶，她說：「羅記係一個好好嘅老師，佢知道我冇錢，佢一個鐘頭嘅堂會同我上個半鐘，同埋佢會教我應該要有嘅風範，佢成日話你唔好着得咁casual啦，你要做得一粒星，你最起碼要着得、要化妝出街，你唔可以牛記笠記，你要有星嘅典範。但係我本身就真係平民啲，我係走平民路線，唔化妝係最舒服，變咗我唔係明星囉，哈哈！」
着住牛記笠記拮魚蛋先夠貼地啫！
|
鍾意就快D Share啦！
|
|
|