無綫娛樂主播林子博的太太董燕君（Shirley）在今年4月確診患上極罕有癌症「平滑肌肉瘤（腹腔）」第4期，因癌細胞已擴散到肝臟、胰臟、肺、淋巴等器官，目前她只能接受化療，幸好他們一家人相當齊心，勇敢面對困境，絕不會輕易放棄。
身為一家之主的子博，除了陪Shirley接受治療外，同時亦要照顧14歲女兒詠渝和10歲兒子卓楠，幸好一對兒女相當生性，日前子博現身囝囝位於灣仔的學校門外接放學，接着兩父子齊齊到街市買餸，卓楠拖實爸爸，全程傾過不停，似有講不盡的話題，去到街市後，兩人先到肉檔買豬肉，子博買了不少偏瘦的豬肉和大量的蔬果，全部都以健康的食物為主，希望炮製均衡飲食，增加抵抗力。
子博與兒子返家，小休一會後，他又陪Shirley到東區醫院接受化療，因目前Shirley的抵抗力比較衰弱，所以見她出入都戴上口罩兼戴帽，亦有外套傍身，以免令身體着涼，大約過了兩小時，子博和Shirley離開醫院。問到太太目前的情況，子博說：「而家太太每3個禮拜入一次醫院，每次做2個鐘化療，其實頭嗰3個月嘅療程已經做完，不過照完CT（電腦掃描）之後，似乎冇乜效，仲有擴散迹象，而家做緊第二階段嘅第二次化療，雖然冇第一次咁痛，但係食嘢冇乜胃口，對腳好似覺得好痠痛，仲有啲水腫，始終呢個病係比較罕見，藥廠唔會專登研製啲藥，所以都會試吓啲新藥，睇吓有冇幫助。」
問到有否打算出國就醫，子博說：「之前有人聯絡過我，話喺美國有一個嘅組織，係由一啲同我太太一樣有平滑肌肉瘤嘅家屬成立，佢哋有好多呢方面嘅研究，同埋亦聯絡過唔少藥廠，有朋友話畀我知，佢有一個泰國嘅醫生朋友，佢嘅媽咪都有呢個病，雖然已經做咗切除手術，但係都擔心媽咪會復發，所以遲啲會去美國同呢個組織開會，到時可以拎埋我太太嘅報告，睇吓可唔可以聯絡到一啲私家腫瘤醫生。」再問有否嘗試接受偏方治療？他說：「我哋而家都係跟番醫院嘅流程去接受化療，我都同老婆講，要樂觀啲，控制吓自己嘅飲食，但係自從報道出咗街之後，有好多人畀咗啲意見，亦都有人畀咗啲天然嘅保健產品，我哋都會試吓唔同嘅方法。」
自從太太患病後，子博表示一對仔女生性了不少：「佢哋乖咗好多，嗌交比以前少咗，太太嘅心情都好咗，可能多咗啲同路人，唔會諗埋一邊。」他亦表示很感謝身邊的朋友和同事的支持，他們一家都會齊心去面對，不會輕易放棄。
採訪、攝影：徐錦池、羅德光、朱志聰
-----------------------------
【撐學生】
召集有心人 撐學生全年睇《蘋果》
立即按此
|
鍾意就快D Share啦！
|
|
|
