去年亞運過後，陸俊彥的港隊隊服化成老父上街飲茶的戰衣，「踩板梗係要型仔着自己衫」，板仔的靈魂不能被一件緊身制服所局限，但一邊是自由奔放、挑戰界限的滑板世界，一邊是以成績定資源、講求紀律的體院運動員體制，兩者看似南轅北轍，陸俊彥還是當先行者走入體制拓荒，「我如果攞到獎，就幫到滑板界多啲嘢，咁我唔介意為滑板去做。」畢竟腳踏滑板騰空飛躍之先，一腳總要着地用力後蹬換取動力。
陸俊彥之名在香港滑板界無人不曉，他在街頭、板場踩出名堂，又代表香港奪得亞錦賽、亞沙運獎牌，2017年他近而立之年，成為首位獲體院精英獎學金資助的滑板運動員，名利雙收，雖非大富大貴，但品牌贊助、政府資助和教班收入足夠生活開支，「香港始終好難用滑板嚟生活，我係好好彩。」惟去年他受傷患困擾，比賽顆粒無收，沒有成績，在香港的遊戲規則下自然失去精英資助，從街頭踩入體院，在大觀園逛了一圈旋又離開，他感慨「有啲格格不入，好似唔係我哋去咁。」
陸俊彥從小遊走於制度邊緣，他在沙田長大，初中時朋友介紹他接觸滑板，「佢話踩板好型，13、4歲我乜都試。」為型，他向生活較富裕的小學同學借來滑板，架着當年流行的無框眼鏡往街頭滑去。在鄰居眼中陸俊彥是街童，「我讀書已經唔叻，學校出名曳，踩埋板直頭無得救。」父母反開放支持，不求望子成龍，只願他堂堂正正不誤入歧途，「老竇話我可以做任何嘢，不過唔好學壞，入黑社會就毆斷我隻腳。」母親恐防他交上損友，有時特意尾隨他下樓，從旁窺看他練習，廿年過去他雙腳猶在，證明兩老實在過慮，「踩滑板壞極有個譜，邊有壞人會咁辛苦喺度練花式。」他咧嘴笑道。
今日的「沙田友」一呼百應，每有自發活動，新城市廣場人山人海，被網民喻為「全港最高質」，但在陸俊彥的記憶中，這不過是沙田久違了的榮光，「以前一到星期五、六晚，大會堂出面全條路都係人，百幾二百人踩板，咁多人一齊玩好正。」在以sms聯絡的年代，非法集結是極其陌生的法律詞彙，他與朋友踏着四輪在大會堂前空地前行，尚未成名的演員白只與朋友合組樂隊「朱凌凌」在旁演唱，城門河畔街坊沿河漫步，與其說是集體踩板，不如說是百花齊放的社區聯誼，昔日的沙田總掛在陸俊彥嘴邊，「好似開party咁，我好鐘意個氣氛所以落嚟『chill』吓，以前都唔使約，睇件衫都認得啲人，有個朋友成日着黃衫，我同班朋友離遠望到就會叫『黃衫！黃衫喺度喇！』」開放的社區中，陸俊彥彷彿發現新大陸，在樂園中流連忘返，「我成個世界都係板，踢波就淨係足球，但係踩板我識朋友之餘，過程會傾偈，又學識着衫、學聽歌，幾有型。」有時在沙田踩膩了，朋友間一時興起提議轉場，又浩浩蕩蕩往尖沙咀去，「即係踩場？」我問。「冇嘅，啲人見到就會話『沙田友入咗嚟』，暗中battle吓咁囉。」陸俊彥說得津津樂道。
那時候的「板仔」心中，踩板不單是個人興趣，也是探索和連結社區的過程，不似今時今日網上資源多不勝數，從前要認識外國滑板技巧，大家只好拿着飯盒，在商場滑板小店門前排排坐，目不轉睛從電視學技；都市處處掣肘，但「有地有樓梯有鐵馬，就乜都有得玩。」與陸俊彥識於微時的小明憶述從前大夥不時到垃圾站尋寶，「我哋見個木箱實淨就攞嚟玩，玩爛先再丟，又會夾錢燒條鐵通，玩完就鎖喺天橋底，成日俾人剪走，隔一排大家忍唔到喇咪又再籌旗燒過。」板仔在隙縫中尋覓容身之處，自然也學懂街頭生存之道。陸俊彥坦言百多人同時踩板，自得其樂也喧聲四起，時惹街坊投訴，被驅趕抄牌是平常不過的事，談那些年的街頭故事，或許他可結集成書，「我經常俾人"手豆“，一日都起碼1、2次，以前傳說”手豆“三次就會拉，所以”手豆“到第二次我就開始驚，咪散一散再返嚟 。」野火燒不盡，春風吹又生，走避散聚間雙方逐漸摸索出默契，「夜班看更同我哋好熟，細個嘈交嘈到大家都friend咗，過年仲會派利是，佢哋叫我唞吓先唔好踩住，仲有連警察都friend埋，佢哋會打畀我聽話有人投訴，佢哋都知我哋唔係搞事。」
陸俊彥小檔案
出生日期：29/07/87（32歲）
身高：1米73
體重：71公斤
曾奪獎項：2019年全國輪滑錦標賽街式滑板亞軍、
2014年亞沙運滑板公園賽冠軍、
2013、2010年亞洲極限錦標賽滑板冠軍
記者：洪量丰
攝影：梁志永、李子健
-------------------
-------------------
--------------------
《體蘋果》陪你睇波講波
https://www.fb.com/appledailysports
|
鍾意就快D Share啦！
|
|
|