訪問中，陳國邦提了好幾次自己過了50歲。他今年51歲，由89年演藝學院畢業加入無綫，30年的演藝生涯，演技一早獲觀眾肯定，雖然從來都與獎項擦身而過，但肯定是民間「最佳綠葉王」之一。
「起碼我都不停有工作，不停有嘢做，綠葉都好過草吖，係咪？或者好過啲野草。」陳國邦說。
曾經三離三合無綫娘家，原先以為前年可以第四度「復合」，已經為《包青天再起風雲》試了造型影了賀年月曆，最後卻臨門被飛。有指無綫不滿當時屬自由身的陳國邦，為ViuTV拍劇和出席活動。
真正原因，陳國邦沒有去深究，「人大咗，知道個結果會係咁樣！深究完之後，我唔想再建立多一個自己唔鍾意嘅人呀，譬如我搵到，原來就係你（下令），我又憎咗你喎！」
對無綫，不言愛恨。如今，全部的愛，留給太太羅敏莊和囡囡陳禛最值得。
撰文：文嘉龍
攝影：陳俊強
| | | |
好藝術家嘅一個演員
當時自由身為ViuTV拍《身後事務所》而得罪無綫，陳國邦最近再度效力演出新劇《娛樂風雲》。訪問這天就正在九龍灣的寫字樓實景趕拍，除了應付邊拍邊播的這齣處境劇，陳國邦每周還要到浸大當老師，教學生演戲。
東家唔打打西家，大台也好Viu也好，對一直只專注演戲的陳國邦來說，分別不大，「其實對我嚟講冇分別。一路以嚟我冇去建立乜嘢人際關係，亦都唔識得點樣去建立，講得好聽啲，就係好藝術家嘅一個演員，講得唔好聽，就係一個好自我嘅演員。我𠵱家幫緊ViuTV拍《娛樂風雲》又好，或者之前嘅《身後事務所》都好，其實我所做嘅嘢冇改變過，呢個就係我認為自己係一個演員要做嘅嘢。」
前年為無綫的《包青天》試了造型拍埋賀年月曆都可以被飛，身在人治的大台，甚麼事情都可以發生，還有去尋根問底的必要嗎？
「唔開心一定有，或者覺得有冇搞錯呀，呢個心態一定會有，但係正如你所講，呢個似乎係佢哋一貫嘅做法，唔鍾意定係有某一啲原因，我都冇去深究，究竟邊一個反對呀？究竟邊一個唔鍾意呀？我亦都冇問，因為了解到又如何呢，喺我嘅角度同我自己嘅人生經驗，或者同年紀都有關，人大咗，知道個結果會係咁樣！好喇，深究完之後，我唔想再建立多一個自己唔鍾意嘅人呀，即係譬如我搵到，原來就係你（下令），我又憎咗你喎！」
入行30年，早看透娛樂圈把戲，陳國邦知道有時候根本沒有真實的答案，「就算你問到去做決定嘅嗰個人，唔通佢真係喺你面前，佢願意咁樣去承認咩，『係呀，佢出席過嗰個活動，我哋唔鍾意呀』，冇人會咁樣講㗎嘛，所以你係永遠唔會find out得到㗎！既然係咁，你搵嚟又何必呢，你用一切嘅時間、用一切嘅精力去嬲，所以既然我都知道自己搵唔到一個真實答案嘅時候，我何必仲要用我嘅時間去嬲一個人，或者去嬲一件事啫？所以我好快就將呢件事放低唔理，繼續做我自己要做嘅嘢囉！」
我唔會嬲TVB呢三個字
陳國邦2015年10月在社交媒體寫下「給無綫電視的公開信」，「在無綫15年間（2000年再回巢），只希望能用自己的能力換取賞識及當主角的機會，結果讚賞得到不少，而機會卻越見渺茫……」結果戲劇性地，兩個月後經毛姐毛舜筠游說演出《愛．回家之八時入席》，而與無綫簽下一年的部頭合約。
三離三合，對無綫仍有感情嗎？「呢一個問題喺好多年前，我曾經寫咗封公開信啦，話我自己離職啦，其實喺嗰時已經對呢個問題好清晰，有一個答案就係，你嬲一間公司好無謂，其實一間公司都係由人造成，TVB呢三個字係唔係代表唔好、好差、乜嘢好專權好霸權，我覺得唔係，而係當時有啲乜嘢人喺度掌舵，或者叫手握大權，當呢個掌權嘅人或者話事嘅人要離職，隨住新上任嗰個人嘅思維係點樣，其實成間公司又會改變，所以我唔會嬲TVB呢間公司或者呢三個字。」
有人的地方，就有政治。「正如我喺嗰封所謂嘅公開信裏面都講過啦，其實我自己當時個心態亦都係，當一間公司裏面嘅員工，娛樂公司又好，你做trading又好，總之喺一間公司太耐嘅時候，就一定會建立到呢個文化，就係山頭文化，一定會，因為當我喺度做第一年嘅時候，我哋大家都唔識；到做第二年嘅時候，我哋開始熟悉；到第三年嘅時候，我開始鍾意你、我唔鍾意你；到第四年嘅時候，我決定攬你，我決定炒佢……一定會係咁㗎！」
埋堆擦鞋與否，睇你自己想做一個怎樣的人，陳國邦絕對明白遊戲規則，他知道，但未必做得出。「咁你嬲得邊個呢？所以OK，你自己決定你自己嘅目標，如果你決定係要爬到去嗰個位嘅，而爬到去呢個位，其中一樣嘢就係要去奉承嘅、埋堆嘅，咪做囉，唔緊要，只要我唔係傷害人，我唔係特登去踩死某一個人，跟住我得到呢樣嘢！只不過有兩個人喺度，呢個就對你冇咁好，我就不停咁對你好，我希望我可以能夠到達某一個位，人性就係咁樣。」
山頭文化，連阿姐汪明荃都曾經在無綫頒獎禮上，公開講過希望公司「山頭文化少啲啲」，可想而知大台山頭多的是。「山頭主義也好，埋堆文化又好，一定會產生呢啲情況，正如我所講，年輕嘅時候，係會有好多嘅憤怒、怨氣、唔開心，但隨住自己人生經驗多咗，個腦叫做開咗竅，我可以咁樣同你講，你估ViuTV唔會有咩？其實每一間公司都有。」
如何在充滿山頭文化的公司自處？陳國邦不懂，人際關係多年來也不善處理，他只知道默默演好角色。被封「綠葉王」多年，開心多定失落多？永遠做不到牡丹？「去到𠵱家唔會再用開唔開心去形容㖭喇，其實都有開心嘅，起碼我都不停有工作，不停有嘢做，綠葉都好過草吖，係咪？或者好過啲野草！我覺得就算你𠵱家叫我做綠葉王都好，都係我自己爭取返嚟㗎，係我憑我自己嘅努力，一步一步咁慢慢去建立嘅！我都會覺得我爭取到一個稱號，或者爭取到大家一定程度嘅認同，縱然我達唔到我自己所希望嘅一個位置，但係我都爭取到一啲認同吖！所以綠葉王咪綠葉王囉，冇所謂㗎！」
過咗50歲嘅體會
這個綠葉王，即使在《大太監》演彭三順一角，曾入圍無綫頒獎禮最佳男配角，賽前呼聲甚高，最後卻失望收場。多年來與獎項無緣的陳國邦，在無綫最大收穫之一，可能是得到太太羅敏莊（Mimi）這個終身伴侶獎。
兩人02年因拍《雲海玉弓緣》而相戀，「我哋兩公婆好難得有好多嘢，即使我哋嘅睇法就算唔一樣，但都好雷同。自己去到人生呢個階段，即係過咗50歲，無論係對於陳禛（囡囡）啦，對於事業啦，人生嘅體會啦，睇法都係好雷同，呢樣嘢係好難得㗎！」
連事業上經歷的高低起伏，兩人都可以互相扶持。「我同佢事業上嘅經歷，真係好似，我就係以做戲嘅情況，普遍嚟講就係話，陳國邦好好呀，但係點解佢去唔到嗰個位呀；同樣Mimi都係，佢唱歌好好㗎，點解又去唔到嗰個位呀，不約而同我哋兩個喺呢個遭遇上面，一路都喺自己各自嘅領域入面浮浮沉沉，都去唔到一個大家都公認，或者我哋自己希望得到嘅一個結果。」
有了陳禛，當上爸爸的陳國邦，更加萬事以家庭為重。「有咗陳禛之後，真係由一個純演員，𠵱家變成爸爸，個心態轉晒，就係點樣去為個女，去為佢做得更加好，唔係淨係做戲、事業做得更加好，而係點樣去做一個爸爸去教佢，點樣教導佢去同人相處，為佢嘅未來盡量鋪一條好啲嘅路，都係盡量啫！」
陳國邦兩公婆一直喜歡泰國，三年前已經在曼谷當地買樓，準備為陳禛到當地升學作準備，「係退休人士計劃啫，即係你有一定嘅金錢喺泰國銀行有個戶口，過咗50歲，咁本人已經過咗喇，咁你就可以申請呢個計劃，所以冇話乜嘢移民嘅！香港咁細，泰國成個國家咁大，其實有好多學校，Mimi其實都做緊好多唔同嘅research，其實佢（囡囡）都未夠7歲，要下個月尾先7歲，所以我哋係有個計劃啫，一定係要有預先嘅安排㗎啦，應該都係兩、三年後嘅事。」
人生下半場的場地，好大機會在曼谷陪住女兒成長，三個人一條心。「當然大家都希望兩公婆一齊能夠去work out，就好似結婚嗰個誓言咁樣，即係希望可以同諧白首，希望大家行到人生嘅終結……個個結婚嘅時候都係咁講㗎啦，但係其實香港嘅離婚率都幾高㗎，所以原來真係可以行到最後嘅，係好難得㗎！當然我𠵱家呢一個時空，我哋未去到最尾，得唔得嘅話其實都未知，但係照𠵱家咁嘅形勢睇，都係會嘅！」結婚十周年的陳國邦說。
後記：錫錫
事無不可對人言，陳國邦說，兩公婆試過在電視節目中公開鬧交細節。
「其實我哋都好願意去話畀人聽，我哋鬧交嘅時候，我打爆咗個電視機呀，跟住我外父外母就嚟好似同我講數咁樣，但係其實唔係，我外父外母嚟到係話兩公婆點會唔嗌交，結果咪又係行到去最後一步，我外父外母係咁樣去疏導我哋。有冇嗌交？一定有㗎，但係有冇好大嘅危機，梗係冇啦，因為我哋去到𠵱家都仲係瞓覺錫錫呀，朝頭早起身錫呀；我哋同個女都係咁㗎，起身錫瞓覺錫返學錫拜拜錫食飯錫，成日都會錫、成日都會攬住一齊！」
一家人，齊上齊落。
|
鍾意就快D Share啦！
|
|
|
