掃呢頁CODE去手機

2019年10月3日 星期四

【獨自去公立醫院覆診】患上腎衰竭 腎功能只剩一成 吳耀漢:問題係入面有好多水泡 __,吳耀漢,

90年代已淡出影壇嘅吳耀漢,偶爾會拍吓戲過吓戲癮,直到13年,佢全面復出拍電影《殭屍》。屈指一算,吳耀漢雖然已經79歲,但仲好精靈,平均每年拍兩部電影 ...




90年代已淡出影壇嘅吳耀漢,偶爾會拍吓戲過吓戲癮,直到13年,佢全面復出拍電影《殭屍》。屈指一算,吳耀漢雖然已經79歲,但仲好精靈,平均每年拍兩部電影,產量算唔錯。上年年底,佢出席電影首影禮時自爆患上腎衰竭入咗醫院,當時佢話腎功能只剩兩成,嗰段期間,佢每日要去醫院洗肚4次,全面停工咗一段時間。而家,吳耀漢精神好咗好多,唔使每日去醫院洗肚,自己可以喺屋企洗。

公立醫院排隊覆診

呢日,見佢一支公喺公立醫院出現,先去自助拎籌機攞籌,然後行去內科門診區,問咗當值醫護員幾句,聽完後,佢搵個位坐低,邊睇覆診紙邊等入房睇症。坐坐吓,吳耀漢覺得唔多對路,行去搵第二個當值醫護人員,問完又再坐低,邊玩電話邊等入房。終於輪到佢喇,入房睇完症後,出嚟坐低,拎住一大疊新文件嘅佢,睇兩睇唔明,又問吓醫護人員。好,明晒之後,吳耀漢行去排隊登記預約覆診日期。搞好預約後,拎住張攞藥紙嘅吳耀漢,唔多識路,搵唔到取藥處,行到𨋢口,望幾望唔對路,就走去搭扶手梯,落多一層搵路。打電話問吳耀漢,睇吓佢呢排身體點,佢話:「身體OK呀!而家真正好似退休狀態,唔係我想退休,而係香港冇戲拍呀!」

腎功能差好多菜唔食得

雖然唔使去醫院洗肚,但係要每兩個月去覆診一次,仲要好小心飲食!吳耀漢話:「飲食要戒得好清,人生少咗好多嘅享受,唔游得水啦,人好易攰,行山嗰啲都唔使諗啦,鍾意做嘅嘢而家都做唔到戒口戒得好犀利呀,乜嘢汽水都唔得,太甜又唔得,太鹹又唔得,最攞命係好多菜都唔食得,因為菜嘅礦物質好高呀!」舊年因為腎衰竭入院嘅吳耀漢,當時check到腎功能剩低兩成,唔知而家點呢?「而家大約剩番一成至成半,醫生話如果飲食戒得好嘅話,希望可以維持住一成問題係而家身體開始散囉,左眼跟住就要做白內障手術囉,早兩個月個鼻就流鼻血,流到要去醫生度止血呀,身體嘅機件開始壞,邊樣有問題就應付邊樣」

睇醫生唔需要人陪

好彩佢天生樂觀知命,就算身體唔好,都冇怨天怨地,好積極咁面對!但點解唔叫阿仔吳嘉龍陪去覆診呢?「佢冇時間呀,我唔使人陪嘅,自己揸住架車四圍去,我冇事嘅!」雖然每兩個月先去公立醫院覆診,但吳耀漢亦有keep住去私家醫生度照超聲波。「照緊腎、膀胱和前列腺,三樣嘢,照緊超聲波,因為可以觀察住萬一有咩問題,我個腎嘅問題係入面有好多水泡。呢個係遺傳,唔知點解呀,有啲人有,有啲人唔係太犀利,但有啲人就生滿晒,我唔係太嚴重啦,都仲有啲功能,醫生就話太多水泡就會影響個功能。」

攝錄:蕭敬漁、東尼

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料https://t.me/nextmaghk

最新消息https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情https://s.nextmag.hk/e/Tssefy687Z

鍾意就快D Share啦!