掃呢頁CODE去手機

2019年11月4日 星期一

近兩年零工作劈炮喬寶寶斥無綫山頭多 __,喬寶寶,無綫,

【娛樂人物】在廣華醫院出世、半世紀都住在廟街的印度裔香港人喬寶寶,2006年放棄做懲教署的二級懲教助理,加入無綫已經13年,可惜近年工作卻一年比一年少 ...


【娛樂人物】

在廣華醫院出世、半世紀都住在廟街的印度裔香港人喬寶寶,2006年放棄做懲教署的二級懲教助理,加入無綫已經13年,可惜近年工作卻一年比一年少,最近兩年更是零工作。喬寶寶灰爆下,決定與無綫提前解約:「十幾年緊守崗位都冇運行!」他更大呻無綫保守、山頭多,令到演出機會減少。

撰文:余燕儀

攝影:沈健程

相關新聞:呻南亞受歧視 鬧政府唔聽訴求

現年49歲的喬寶寶2005年參加《殘酷一叮》因夠搞笑受歡迎,其後放棄在懲教署做阿Sir,加入無綫。對演藝圈一腔熱誠的他,以為臨走前可以有代表作,日前喬寶寶接受《蘋果》專訪時,卻大呻被無綫冷待:「2013年喺蘇格蘭返嚟後,少咗好多嘢做,但嗰時一年都有兩個劇,慢慢一年比一年少,2016年開始一年一個劇,今年直程一個都冇。」於無綫盡忠職守13年,喬寶寶原計劃明年才返蘇格蘭跟家人團聚,無奈灰爆提前解約。

王維基在2012年撬走不少無綫藝人加入香港電視,喬寶寶緊守崗位留在無綫:「我覺得我哋緊守崗位啲人應該多番嘢做,但反而冇呢啲歌仔唱,都幾灰,十幾年緊守崗位都冇運行。」是否得罪高層才無運行呢?喬寶寶坦言:「我不嬲都唔得罪高層,做乜角色又冇所謂,就算閒角都唔會詐型。2015年同上面反映過好少嘢做,越反映越少嘢做,都失望,咪提早走囉,原本合約去到下年7月10日,我覺得都冇乜意思,不如取消,我冇底薪,係拍嘢先出糧,成年冇拍嘢冇糧出。」



唔批拍港台劇

盡忠職守13年,卻落得如此下場,喬寶寶說:「少少心酸,就算唔係劇集,綜藝節目都可以搵我,但又請外援,幫你打滾咁耐,都幾灰,唔係咁開心,但冇辦法。記得有次港台《有房出租》搵我做其中一個主角,問我有冇興趣,我同無綫反映,講咗幾個月,最後都唔批,原本港台諗住我得,因為自己都冇嘢做,但又唔放我出嚟,講真我都係想多啲曝光,留番個回憶畀自己。」在無綫多年,喬寶寶最感激監製王心慰:「可能保守得滯或者山頭多,來來去去我真係有角色做都係王心慰嘅劇集,記得有次佢搵我喺《迷》做客串角色,佢話『唔好意思呀,客串一兩場介唔介意?』一個監製搵我仲要講啲咁客氣說話,其實好難得。」

在懲教署做了16年,在無綫做了13年,喬寶寶還是喜歡藝人:「藝人可以做自己鍾意嘅嘢,始終紀律部隊嚴肅啲,唔可以開玩笑。我個人比較活躍,2006年入TVB,但未辭職,懲教問做明星定做阿Sir,我諗香港百幾年歷史,冇一個南亞人全職做演員,如果我可以犧牲長俸入娛樂圈,對其他南亞人有幫助,我就決定辭職。當時懲教同事都有叫我諗清楚,又話我真係唱得交叉難聽,唔係諗住唱嘢搵食呀?我話都係拍嘢箒,冇諗住唱歌,我估唔到呢十幾年八成收入靠唱歌,𠵱家好多公司周年晚宴、婚宴搵我唱歌,一個月五、六單,聖誕節有十幾單,每單兩、三萬,收入非常之可觀。」

相關新聞:【意興闌珊】河國榮拍90劇離巢



喬寶寶原以為在明年移居前可以有新作品,但近年工作卻接近零。 喬寶寶原以為在明年移居前可以有新作品,但近年工作卻接近零。
行廟街時,有店主認得喬寶寶,立刻捉住他要集郵。

行廟街時,有店主認得喬寶寶,立刻捉住他要集郵。

7月做通波仔

明年喬寶寶返蘇格蘭,終於可以跟老婆團聚:「老婆唔喺度,食嘢唔定時,今年7月通波仔,有一條心血管塞咗99%,好在有買保險,唔係嗰20幾萬唔知點算。𠵱家食緊藥,副作用令自己越嚟越肥,7月到𠵱家肥咗30磅。」原來當時他曾徘徊生死邊緣:「半夜起身氣促、標冷汗、唞氣好唔順,報告話其中一條血管栓塞,喺養和做手術,之後返蘇格蘭休息一個月。」

場地提供:Seasons Restaurant & Bar



【《殘酷一叮》】喬寶寶在2005年參加《殘酷一叮》,因夠搞笑而大受歡迎。資料圖片

【《殘酷一叮》】喬寶寶在2005年參加《殘酷一叮》,因夠搞笑而大受歡迎。資料圖片
【《月滿軒尼詩》】喬寶寶也拍過2010年的電影《月滿軒尼詩》,與湯唯有對手戲。劇照

【《月滿軒尼詩》】喬寶寶也拍過2010年的電影《月滿軒尼詩》,與湯唯有對手戲。劇照
【《翻生武林》】喬寶寶去年拍過劇集《翻生武林》,但只在第一集出現。電視圖片

【《翻生武林》】喬寶寶去年拍過劇集《翻生武林》,但只在第一集出現。電視圖片

鍾意就快D Share啦!