2019年11月7日星期四

【頭條獨家】聚少離多導致離婚龔慈恩覓第二春順其自然 __,龔慈恩,

【頭條獨家】聚少離多導致離婚龔慈恩覓第二春順其自然

56歲的龔姐外型keep得好，雖然冇打算搵第二春，但搵對象一定唔難。

龔慈恩最近跟吳岱融在《牛下女高音》中第Ｎ次合演夫妻，不過今次龔姐發惡做個強勢老婆，搞到岱融哥都怕怕，她坦言自己在港劇少有這種演出幾有新鮮感。不過她強調現實自己並不強勢，跟前夫林煒離婚只因聚少離多，感情轉淡，大家都適應沒有對方在身邊生活，而現階段她也不心急覓第二春，一切順其自然。撰文：杜淑霞攝影：李維隆

龔姐和岱融哥早於88年TVB劇集《嬴單傳奇》中合演夫妻，往後經常演一對，連龔姐都數唔清兩人合演過幾次，「最近除咗呢套仲有《飛虎之潛行極戰》、未播嘅《大醬園》，之前喺其地地方嘅劇集都試過，真係合作咗好多次，起碼有七、八次」不過今次最特別是龔姐比較強勢，「香港嘅劇我比較少做呢類角色，反而台灣劇都有試過這種角色，對香港觀眾應該幾新鮮。」

想搵個旅遊伴

講到現實生活是否一樣是強勢老婆，龔姐就澄清現實並不強勢，「我絕對唔係強勢，其實今次角色都係一樣，只係個事業型嘅女性，個人比較獨立，因為我老公好多時唔喺身邊，好多仔女嘅嘢都要幫手安排。」提到前夫林煒，龔姐亦大方公開離婚原因，「我哋婚後都成日分開，後尾佢爸爸病咗，再到我爸爸身體出問題，阿囡又開始入學，決定返香港定居，但佢啲工作多數喺台灣，我哋長期分開生活，大家聚少離多，感情慢慢轉淡，所以仔女早已經接受呢個情況。」龔姐仲坦承會祝福林煒有第二春，但問到她會否覓第二春時，她強調一切順其自然，「上次話叫岱融幫我搵男朋友係講笑啫！我真係冇諗，順其自然我都想搵個伴，但只係陪我去旅行嘅伴啫！男女朋友都得嘅，我仲有好多地方想去見識，依家仔女都大個，我自己仲有好多嘢想做。」龔姐話囝囝林卓毅已到加拿大升學，亦預了囡囡林愷鈴將來拍拖，不過自己也不愁寂寞。