2019年11月7日星期四

【頭條獨家】仔女大晒一身輕利蘊珍陪友買衫如Stylist __,利蘊珍,

【頭條獨家】仔女大晒一身輕利蘊珍陪友買衫如Stylist

利蘊珍與朋友shopping期間，傾得好開心。

利希慎孫女、無線創辦人利孝和夫人陸雁群的細女利蘊珍（Marie），與九巴後人老公雷禮權（William）育有一子一女，25歲兒子雷正揚是牛津博士畢業生，23歲女兒雷正殷是音樂老師。因子女已長大，一身輕的Marie可以好好享受人生，日前她到銅鑼灣陪友人買衫，見女友人試咗好幾件，她就不斷畀意見。由於她對自己的衣着打扮都好講究，所以好認真畀意見。逗留1個鐘，一行四人乜都冇買，得個揀字，最後輕鬆行去食晚飯。採訪：梁志明

Marie和老公William活躍Ball場多年，二人的性格、嗜好，甚至衣着品味可以說是襯到絕。反而其94歲媽媽利孝和夫人近年絕少出席公開場合，幸好Marie呢個乖女不時在社交網分享媽咪的日常照片。日前兒子雷正揚在英國牛津大學生物化學系博士畢業，Marie與老公一齊出席畢業禮表現得好開心，她表示以兒子為榮。她曾坦言自己受媽咪嗰套，一向管教嚴厲，有時為了教得好仲會體罰子女，雖然老公好反對，但她直言：「現時出到嚟嘅效果（讀書成績）令佢無聲出喇！」

感覺好權威

嚴母Marie日前現身銅鑼灣利園商場Red Valentino專門店，陪三名女友人shopping。最初見她在店內行嚟行去睇衫，行到咁上下就走去睇個女友人試衫試成點，只見朋友試完裙又試褲，每換完一件，Marie就上下打量，然後繞住手畀意見，十足十形象指導咁，甚有威嚴。她的朋友試了三四套，最後一套黑白色，Marie仲上前幫她整埋領口，非常細心。逗留咗成個鐘，試咗咁多套衫都唔啱心水，跟住一行四人邊行邊講離開，然後走去商場第二期嘅餐廳食晚飯。