舐，大大力舐！舐得共多自有人民幣進帳。如果周柏豪真係咁諗，佢就真係太年輕了。仲有張栢芝，仔都生咗三個喇，仲係咁天真咁傻嘅？睇下人哋羅嘉良，三日唔埋兩日就會出post講愛國，仲娶埋個大陸老婆兼移居北京，論愛國肯肯定真心過周柏豪、張栢芝臨急抱佛腳，但結果呢？咪又係因為政治問題、港人身份失去工作機會。
是咁的，有傳內地影視界收到通知，無公開表態愛國嘅港台人士盡量唔好用。結果，內地投資者情願有殺錯無放過，連一直高調愛國嘅羅嘉良都唔敢用，明明簽咗約拍大陸劇《如意芳霏》，最後一樣決定換角。
咁咪即係舐又死唔舐又死，純粹睇大陸心情？係㗎！大陸喺國際舞台上都成日自把自為唔跟規矩，更何況喺國內呢？所以咪辣㷫美國導致貿易戰囉，連USCC（美中經濟與安全審查委員會）報告都建議唔好再叫習近平做「國家主席」，叫「中共總書記」比較適合，免得令人誤會中國有民主，民間更有人對此解讀為暗諷帝制。
講起習大大與帝制，早前台灣網民就發現歌手吳克群（何超蓮前男友）首《為你寫詩》遭到大陸多方禁止：優酷視頻搜索搵唔到原MV；網站bilibili禁止評論；騰訊視頻上嘅舊評論全部delete。點解？網民認為同《為你寫詩》被二次創作成《維尼寫史》冒犯咗習大大有關，因為歌詞不單提及64，更嘲諷維尼愛權：「維尼寫史，維尼禁止，維尼他不喜歡六四，維尼我任期沒有限制，維尼實施帝制。」
唔通吳克群真係躺著也中槍？《壹》仔都嘗試喺bilibili搜索《為你寫詩》，其實仲有唔少相關視頻可以睇到，部分更係本年11月最新上載，且評論功能未被關閉。換言之，暫時、暫時、暫時，好重要講三次，暫時睇嚟都唔係咁敏感、小氣啫。咁周柏豪、張栢芝係咪舐得太心急呢？因住哽親適得其反呀。
【2019 區議會專題】
最齊全區議會入閘名單 互動民調
11.24 用選票重奪區議會
-----------------------------
【升級壹會員登記站 為你解疑難！】
親臨旺角、銅鑼灣做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|
