唐英年真係好似香港人所認為，豬咁蠢？呢隻豬，或者確實如《壹》仔鏡頭捕捉一樣，笑笑口睇落傻更更無乜殺傷力，但其實暗啞底極可能係隻扮豬食老虎。
唐英年之所以「豬咁蠢」，因為佢言論經常引起爭議，講多錯多，例如車毀人亡論、Ngong Ping Sam Luk Ling、顧全大陸、感情上有缺失等等，全都言猶在耳。
不過，客觀現實係，早前流傳嘅臨時特首繼任人選有佢份；近日香港航空危機，傳聞中嘅白武士又有佢份！ 雖然唐英年對前者表示不回應揣測，對後者更已經否認，但呢啲重大事件都離唔開呢隻豬，唔簡單。
何況，唐英年本身已係全國政協常委，有地位，同樣亦有財富。家族旗下清溢光電上交所掛牌嘅首日，家族身家已經即日暴增36.2億元。雖則話係家族旗下，但據招股書介紹，清溢光電由唐英年同佢妹妹唐英敏共同持股，即係公司嘅實際控制人。仲有，佢控制嘅公司，其產品應用於平板顯示、半導體芯片等等，高科技嘢嚟㗎！
之但係，高科技公司大股東，呢日出街嘅目的，竟然係去電話店舖問啲嘢。唔通唔識kill app？斷估㗎咋。
BTW，早前美國總統特朗普簽署《香港人權與民主法案》，唐英年話會以鄙視眼光看待美國做法，好敢講喎。但《壹》仔問到佢點睇最近靜返啲，佢就唔敢講了。「多謝，唔該晒。」唐英年答。
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|
