坐飛機時遇到機組人員服務不周可以點？有人會選擇啞忍，亦有人會選擇向相關單位投訴。然而，自社交網絡興起後更多了一種途徑叫網上圍爐公審，莊思明日前在社交網絡上發千字文投訴，在航班內多次被空姐忽視借筆要求，其後更貼出所乘坐航班的機組人員名單，遭網民鬧爆泄露私隱，雖然莊思明火速刪除貼文，但私隱專員公署指可能已違反「刑事起底」條文。
莊思明家姐莊思敏，今日應剛剛成立、以愛國愛港止暴制亂為宗旨的「香江同心會」邀請到旺角出席捐血活動，莊思敏對妹妹的事作出回應，她首先指現在網上世界很容易將事情發酵到有理說不清，每件事都有不同的角度去看：「我有同個妹傾過，一開始可能佢只係想分享件事，將自己唔開心經歷講出嚟。後來因為一啲激進言論令佢一時衝動，佢又陸陸續續post唔同嘢出嚟，令到件事繼續發酵，相信事件對佢係一個經歷。」
莊思敏又替妹妹解釋，稱妹妹性格執着，每件事情都要不斷解釋，但她認為這套方法在網絡世界上行不通：「網絡世界你要一個對咁多個，你解釋唔到咁多嘛，希望件事盡快平息，唔好再影響到其他人啦。」
除了因為借筆一事而公審機組人員，問題癥結是莊思明上載機組人員名單的行為，涉嫌觸犯私隱條例，亦因此引起更大的討論，莊思敏說：「以我所知係最初佢只係分享，借筆同唔借筆嘅言論先，當然我冇睇晒所有post，唔知道有乜嘢人嘅言論刺激到佢，令到佢post出一張有機組人員嘅名單出嚟，呢件事相信令到好多人唔開心，對此係唔好意思嘅，我妹妹都覺得呢件事影響到人係唔好意思，佢都知道自己唔應該太衝動。」
莊思敏再解釋以他們所知這張名單並不牽涉法律問題：「上面只有姓名，冇其他個人資料例如身份證號碼、地址，電話都無嘅，呢份文件喺我妹妹立場，唔係一份confidential，唔係有私隱度嘅文件，所以佢冇為意到。但當然唔代表佢呢個做法係啱，呢張名單喺其他人post出嚟可能冇咁大反應，可能我個妹係公眾人物，所以引致咁大嘅迴響，希望盡快平息。」
莊思敏亦同意莊思明今次做法未必啱，亦完全可以避免，她說：「我都有叫佢以後唔好咁衝動。」經過今次事件，以後妹妹生日可以考慮送筆做禮物？她說：「每年嘅禮物都係一打筆，我會喺佢所有褸袋度插滿晒筆，總之上機一定有筆用，包括我見到其他航空公司攞佢呢件事嚟講笑，我都覺得係幾得意，總之希望大家開心。」
採訪：曹家誠
攝影：仇志德
|
鍾意就快D Share啦！
|
|
|
