曼聯喺冬季轉會窗最後關頭，緊急向中超上海申花借用前鋒恩哈路，球迷除咗對呢位尼日利亞前鋒嘅級數同狀態有疑問外，對於佢嚟自武漢肺炎疫情嚴重嘅中國亦好有戒心。據英國媒體《The Athletic》報道，曼聯喺落實借用前亦特別為佢進行「武漢肺炎審查」，除咗一般健康檢查之外，亦要審查佢最近去過嘅所有地方，確保佢冇到過任何高危地方先至放心簽約，而恩哈路經理人亦形容成個轉會過程極之匆忙，好在最終都能夠成事。
不過，現年30歲嘅恩哈路目前狀態就好有疑問，曾經喺屈福特同上海申花教過佢、可以話係佢恩師嘅西班牙教練科里斯透露，由於中超同英超水平分野太多，恩哈路至少要操多1個月先可以提升到理想狀態：「最大問題係，中國式嘅訓練同英超完全唔同，體能需求完全係兩個世界，佢需要1個月時間去搵番個狀態，樂觀嘅係恩哈路好識照顧自己身體，而且仲非常勤力。」
來源 source: http://hk.on.cc
|
鍾意就快D Share啦！
|
|
|