掃呢頁CODE去手機

2020年4月14日 星期二

滙豐風水被破三大死因 蔣匡文批:衰多3年! #滙豐

滙豐獅子被淋紅油兼木箱封印,一衰再衰,著名建築師及術數家蔣匡文接受訪問,從風水角度娓娓道出滙豐衰敗之路。今日咁衰,獅子封印只是導火線,查實由2007年 ...






滙豐獅子被淋紅油兼木箱封印,一衰再衰,著名建築師及術數家蔣匡文接受訪問,從風水角度娓娓道出滙豐衰敗之路。今日咁衰,獅子封印只是導火線,查實由2007年開始清拆舊天星碼頭以至中環總行「空心老倌」的設計,到摩天輪轉動,變成太歲頭上動土,一步一步將滙豐帶入衰路。適逢今年土星與木星相會,正是每20年一次地運轉移之時,轉入九運,滙豐最終難逃厄運?

蔣匡文表示,滙豐叫「大笨象」,中環總行門前一對獅子就是「大笨象」的守衛,獅子化煞,被淋血油如被克制,木箱封閉,就更加難擋外來煞氣。「滙豐嘅衰敗唔係淨係呢一樣嘢,只不過呢樣加劇佢今年嘅衰敗。淋紅油只不過係最後一根稻草,令到佢出現呢個現象。」他擔心:「搞獅子嗰個人會有大問題。當年滙豐搬遷,獅子搬離地後,一個外國工程師貪得意坐喺半空獅子上。後來滙豐清拆時發生小火,一個工程師負責帶消防員巡查火種,當時深夜斷水斷電,結果呢位工程師唔小心跌落一個廢棄咗凹槽跌死咗,呢位死者就係當年貪得意坐喺半空既獅子上面嘅人。所以我好擔心淋紅油同埋火燒嗰兩個人嘅後果,逢親呢啲有煞氣嘅嘢就唔係亂咁搞,你搞佢,除咗累滙豐之外,亦累埋搞嗰個人㗎!」

清拆舊天星碼頭 吸水象鼻被擰歪

滙豐之衰,像命運安排。蔣匡文指:「大笨象其中一個重點係象鼻,象鼻就係我哋今日企嘅皇后像廣場,一路伸到去舊天星碼頭,舊天星碼頭有兩個停泊位,舊時滙豐就係對正呢兩個位。有呢個碼頭後,滙豐生意一日千里,一路都好掂!直到,清拆舊天星碼頭,然後填海,一拆一改,滙豐就喺2007年第一次,幾十年嚟嘅盈警,跟住就金融海嘯爆發。」他補充,滙豐當年擁特權,港英政府讓他們鑿一條地道直通天星碼頭,用以抽碼頭海水回大廈作冷卻系統,「嗱!呢啲就係當年殖民地舊天星碼頭清拆,佢就要將呢個系統改歪,而家碼頭旁邊都仲有呢個系統,你仲見到個口。咁呢條管就應咗大笨象吸維港水嘅意象,但而家唔係直吸,係歪吸。」目前在中環10號碼頭旁,可看見兩個出水位。

滙豐象鼻擰歪影響財運?他續解:「原本食正維港水,而家鼻歪咗,所以2007年至今,一直麻煩不絕,例如被美國罰錢。其實歪咗都仲吸到錢,但梗係無直吸得咁順。佢仍然搵錢,但而家搵到錢唔畀派咋嘛,香港係年年幫佢搵錢喎,佢唔畀派錢咋喎。」

設計呈空心老倌 太歲頭上摩天輪

賺港人錢不回水,是另一個風水格局所致。蔣指出,滙豐英國金絲雀碼頭總部風水極差,「所以年年就要香港呢個仔養。恒生賺錢養滙豐,滙豐賺錢就養金絲雀碼頭。中環滙豐總行而家呢個新設計,大堂樓高六、七層,猶如玻璃箱,呢個形就叫『空心老倌』。滙豐遷冊後咁多年賺嘅錢,其實係幫老家找咗啲蝕賬,年年都喺香港賺咗錢揼去老家救亡,呢個咪就係空心老倌,即係我啲錢,你賺晒啦,但唔留喺香港,畀人哋捲咗去。」

清拆碼頭、空心老倌設計是遠因,而滙豐前方放置摩天輪就是近因。「滙豐對正摩天輪,今年太歲位係正北,滙豐正北就向正摩天輪,佢日日喺度轉,所以今年犯太歲。過咗出年喇,太歲位過咗,等於舊年林鄭都過咗喇,林鄭今年咪平靜啲囉!(但無法改變市民對佢嘅印象?)咁就另一回事。」去年太歲位在西北位,特首辦的西北位正是摩天輪日夜轉動之位置。


滙豐要衰多3年 搬摩天輪有運行

那麼滙豐這個「香港人的銀行」地位是否不再?蔣解釋,滙豐食正港督府(禮賓府前身)龍脈,龍脈分中、東及西三條,東西均向教堂,中間落脈就是滙豐現址,是龍穴所在。很早期滙豐現址原本作為興建市政局,但當年港英政府為求賺錢,把這幅地皮售予滙豐,所以為何前方會有皇后像廣場設計,後來滙豐落成,變相掌管香港財政,相當於香港的中央銀行。

蔣認為,滙豐現在犯太歲,英國又窮困,股民想以股代息機會微,長遠而言應該遷冊回香港,因為香港總行風水靚過英國金絲雀碼頭。滙豐是七運樓,「而家入口方位,風水上稱『八白飛乾二黑入,財源大進』格局。所以佢唔係搵唔到錢,香港係搵到錢,搵咗之後要養阿媽。不過風水唔係淨睇方位,要睇過所處位置及周邊地理環境。滙豐左邊係商廈酒店,右邊係高等法院,左邊長啲,左青龍右白虎合局,局勢好靚,只不過自己設計錯誤及其他種種錯誤。如果轉入九運仍然旺,但不復當年勇,你睇今日股票價值,喺香港佔比都一路縮緊。以前滙豐一隻獨大,而家邊有呀?咁多騰訊呀……其他嗰啲嘢……出年會好過今日嘅,因為今年犯太歲,就係呢個摩天輪,下次再犯太歲就係9年後囉!」

但他強調:「地位動搖咗,唔係無咗!」他屈指一算,「滙豐大概要衰多3年,跟住會好返。97至今,都係一浪一浪,唔係97直插咗就一路沉到尾,而係跟潮水咁,有上有落,最主要問題係3年、6年、9年後,呢個摩天輪仲喺唔喺度呢,呢個就係影響關鍵。摩天輪,就好似有人打一拳過嚟,而個人打多拳,唔一定拳拳中,而今年打一拳埋來就打中。(搬走咗係咪會好啲?)特首辦當年都唔該叫個摩天輪搬走」他意指,搬走摩天輪,滙豐才會有運行。對於工程師跌死及地道直通舊天星碼頭,滙豐發言人回應:「不回應巿場傳言或揣測。至於滙豐總行大廈的水管,是本行空氣調節系統的一部分。」

記者:陳家雄

影片

採訪:陳家雄

編撰、旁白:張嘉鎣

攝影:葉泳成

剪接、後期:Wohc

編審:倪敏慧

清拆碼頭、空心老倌設計是遠因,而滙豐前方放置摩天輪就是近因。


著名建築師及術數家蔣匡文接受訪問,從風水角度娓娓道出滙豐衰敗之路。


中環總行門前一對獅子就是「大笨象」的守衛,獅子化煞,被淋血油如被克制,木箱封閉,就更加難擋外來煞氣。


蔣匡文表示:「滙豐對正摩天輪,今年太歲位係正北,滙豐正北就向正摩天輪,佢日日喺度轉,所以今年犯太歲。」


蔣匡文表示:「舊天星碼頭清拆,佢就要將呢個系統改歪,咁呢條管就應咗大笨象吸維港水嘅意象,但而家唔係直吸,係歪吸。」


蔣匡文指,長遠而言應該遷冊回香港,因為香港總行風水靚過英國金絲雀碼頭。



鍾意就快D Share啦!