森美爸爸今年66歲，兩父子只相差20年。
森美爸爸以前是消防員，一份工打足37年，直至退休。
森美爸爸是公主號的乘客，在「疫輪」 度過了10多天，執返條命。
中五之前，森美兄妹和父母住在葵盛西邨，日前兩父子重遊舊地，「搬咗未嚟過，佢讀中五嗰年搬，20幾年啦。」森美爸爸說。當年他們住在第5座，樓下是公園，兩人踏着舊日的足迹，森美勾起無限回憶，「呢個公園成日喺度打躉，最記得嗰時因為治安唔好，互助委員會要街坊輪流落嚟守住公園，攞住碌棍行嚟行去。」童年時，森美在爸爸陪伴下到公園踩單車、打乒乓球、爬鋼架，「最記得以前晾衫出去，就算有衫夾夾住，大風會吹走，衫褲跌落3樓走廊上面個頂，細個睇住阿爸爬上去攞，大啲就我爬上去執底褲，真係為咗條底褲命都唔要，哈哈！」
直至中五那年，一家四口搬去消防宿舍，有個消防員爸爸，森美既驕傲又擔心，「細個時都有擔心，因為爸爸職責係駕消防車，心裏面諗應該入火場機會少啲，個心就安啲囉。記得屋企有個組合櫃，裏面擺酒杯，有一日，酒杯裏面有張剪報，報道火場時影到老竇，佢就剪低擺喺酒杯裏面。」森美爸爸笑了，「好開心嘛，嗰時救火影到我，正面嚟，好大頭，可能我靚仔搶眼啲，哈哈哈。」
森美爸爸18歲做消防員，做了37年，直至退休，「第一次入去火場好緊張，又黑又大火，驚出唔到嚟，驚到阿爸姓乜都唔知，有個做得耐嘅同事叫我唔使驚，摸住條喉出去。」森美覺得做消防員的爸爸好偉大，自爆年少時曾「玩火」被打，「我唔鍾意阿爸食煙，有次趁阿爸阿媽唔喺屋企，攞咗阿爸啲煙擺喺摺凳上燒晒去，好似林則徐燒煙，但燒完之後摺凳燶咗，俾阿爸知道玩火死梗，攞張摺凳去丟，我都醒目，丟去上一層，以為神不知鬼不覺。但人真係唔可以做壞事，第二日阿媽返嚟：『點解垃圾房有我哋屋企張摺凳？』原來阿媽打完牌落嚟認得。人生第一次由阿爸打係呢次，『我係消防員救火，你個死仔玩火。』」
當年一家四口住公屋，為了供兒子讀寄宿名校，森美爸爸做兩份工，正職消防員，放假駕夜更的士，當年的森美，很多時見爸爸都是睡着了，「我記得同知道爸爸辛苦，因為住中學宿舍，每年開學前一日，大家車啲衫、床褥去學校，嗰時同學個個屋企都有錢，記得第一年老竇落更駕的士車我返學，feel到礙眼，個個都Benz、寶馬，我哋的士；第二年，老竇問人借咗架私家車車我，嗰時知道爸爸苦心……（哽咽）佢覺得好睇啲，嗰時開始生性讀書，覺得屋企……」他邊抹淚邊自嘲，「唔知點解喊，有乜好喊。」
森美爸爸靦腆地笑，坦言當年問朋友借萬事得121送子返學，「想個仔好睇啲，人人都有架車，雖然你架車細架啲，都唔會駕架的士，雖然自己覺得冇嘢，但費事個仔俾人覺得寒酸，有少少比較。點解送寄宿？因為屋邨下面五金舖兩個仔喺嗰度讀書，成日話間學校好，佢又唔知道我哋冇乜錢，嗰時寄宿要$1600-1800，我人工得$5,000幾，我心諗你做老闆梗係話好，我哋打工，佢講得咁好咪試吓。」
養兒方知父母恩，森美想起當年送兒子到英國讀書的情景，再次灑下男兒淚，「我都係咁嘅原因生性，到而家都好記得情景，所以我喊得最勁，係送我個仔去英國讀書時……（再抹淚，停頓數秒）我駕車去……因為咁啱喺海邊，我中學都喺海邊，我唔係唔捨得個仔，但嗰下connect咗，（索鼻，攬住爸爸，聲沙）我喺英國即刻打電話畀阿爸，『我終於明白你嗰時心裏諗乜』阿爸話：『你知咪好囉！』」森美爸爸對兒子的要求好簡單，「讀到書入到大學已經好滿足，唔需要搵幾多錢，保持現狀已OK，我要求唔高，做人最重要開心。」
一場武漢肺炎，令父子的感情更親密，今年2月疫情最嚴峻時，森美父母是疫輪公主號的乘客，在船上被隔離14日，返港後再於駿洋邨檢疫中心隔離14日，而森美在英國讀書的兒子，回港後在家中隔離14日，三代同堂再見面，已是個多月之後。
逃過一劫的森美爸爸憶述，「森美好擔心我，我就好擔心嗰啲病菌，一日有70、80人感染，嗰段時間好down，喺架船間房，出去只1小時，曬太陽又驚可能感染到，出過去兩次，之後越嚟越人多，我就唔出去，除咗開門攞嘢食，喺房度過10幾日。人哋話似坐監，但我覺得坐監冇我咁辛苦，坐監唔會有生命威脅，每日由朝到晚驚病菌，返嚟個人好似釋放咗，坐監唔夠我辛苦，所以我唔怕坐監。」
森美坦言現在才知爸爸擔心：「我都唔知，佢冇話過驚，返嚟至講，可能驚我哋擔心，我哋隔好耐之後見番，因為佢隔離完返港再隔離，咁啱嗰段時間我去咗加拿大，返嚟自我隔離14日，再等埋個孫隔多14日，一家人坐埋食飯，場景好簡單，清茶淡飯，冇開炮仗，冇大魚大肉，原來要求咁少都咁困難，好難得。」
撰文：余燕儀
攝影：沈健程
攝錄：廖達燊
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|