2020年6月20日星期六

晒愛貓昏睡片蔡卓妍被網民關注：點解要困籠？ #蔡卓妍 #阿Sa

晒愛貓昏睡片蔡卓妍被網民關注：點解要困籠？

「嚦咕」好反瞓，熟睡樣相當可愛。

蔡卓妍（阿Sa）除咗養咗5隻得意小狗外，今年年頭開始成為貓奴，飼養愛貓「嚦咕」，阿Sa錫到「嚦咕」不得了，形容係她「老細」，用兩個小時同佢砌貓城堡，又揚言打造牠成為小公主，教牠好似小狗咁畀手手…而之前蔡卓妍分享愛貓寫真相時，「嚦咕」喺窗台上望室外風景時，令阿Sa無敵海景豪宅意外曝光，香閨相當闊落。

最近阿Sa忙於同Sammi（鄭秀文）宣傳新戲《聖荷西謀殺案》，連續幾日不停做電影宣傳，返到屋企，平日跳跳紮，活潑嘅「嚦咕」經已喺貓籠小天地度熟睡中，仲瞓到反晒肚，撐晒腳，其中一隻手仔伸咗出籠外，連阿Sa拍緊片都唔知，明顯好有安全感，累爆嘅阿Sa見到「老細」人見人愛嘅熟睡樣都精神一振，還自爆自己都有反瞓習慣，留言道：「太耐未試過一日做10幾個訪問，全日著住高踭鞋，真係要一邊瞓覺一邊拉筋先得，早抖，#我老細瞓覺個姿勢同阿媽一樣，#有其母必有其女 #嚦咕。」唔少網民愛屋及烏係埋「嚦咕」fans，大讚牠相當cute，但有超級愛貓人士忍唔住發聲：「其實想問下點解要困佢喺寵物籠？」、「請問點解要困住喺貓籠呢？」不過阿Sa就冇回應。