武漢肺炎爆發第三波，娛圈第一批中招的麥德羅、其女友Apple姐、歌手施匡翹和宣傳人員阿佳仍留醫，而跟麥德羅有接觸的劉少君亦確診，麥德羅曾出席的屯門富臨有至少10人確診。今日新城執行總監程凱欣中招，之前她曾與施匡翹出席活動，兩人都冇戴口罩，程凱欣亦冇戴口罩跟施匡翹師弟謝高晉合照。
對於程凱欣疑接觸施匡翹確診武漢肺炎，施匡翹的唱片公司發言人表示，施匡翹、謝高晉、Apple姐對程凱欣深表慰問及祝早日康復：「施匡翹近期沒有接受過程凱欣訪問，只是7月8日謝高晉直播live音樂會當晚跟程小姐合照過，及打過招呼，謝高晉之前則接受過程凱欣節目訪問，但高晉檢測係陰性。」
之前血壓飆升至180及出現氣促要用呼吸機的麥德羅，今日終於退燒，他拍片報告身體情況，精神好轉了，但說話仍有點氣促，對自己疑傳播病毒感抱歉：「大家好，多謝大家一直以嚟嘅關心，我得到呢個病，直情我都唔知喺邊度得到，如果有同我接觸嘅朋友感染到呢個病呢，我都萬二分抱歉，希望你都快啲好番。」
因為之前病情反覆，要用呼吸機的他表示：「我前日冇用呼吸機，呢兩日好番啲，尤其今日退晒燒，已經發燒咗5日，今日比較好啲，呼吸方面好少少，雖然仲有啲喘氣，個肺仲有少少痛，但起碼冇屙冇嘔冇發冷發熱，應該都會好番啲，醫生會再同我檢查一次身體，check鼻哥窿插條管再化檢，希望感染到嘅朋友快啲好番，大家記住洗手、戴口罩，我會繼續努力同飲多啲水。」
Apple姐就被轉往三人病房，瞓覺都戴口罩自保：「今日我嘅情況都係差唔多，冇發燒、血壓正常，原先我自己一間房，但真係好多人確診，政府醫院病房唔夠，調咗去三個人一間房，本身我冇該，但因為其他病人有咳，為咗安全我長期瞓覺同戴住口罩。醫護人員好細心照顧我哋，好感恩，希望大家都快啲好，香港疫情快啲解決，祝福大家。」
施匡翹的第二次唾液報告，跟第一日的檢測差不多：「醫生都話係預計之內，唔會咁快冇，而血壓係正常。我收到好多分享方法，叫我飲鹽水，我都會試吓，24號會再有測試，知道結果會同大家講番。我好好彩，屋企人可以帶物資畀我，因為醫院乜都冇，佢哋帶咗好多日用品、沖涼液、鹽，提提大家食多啲維他命C，可以增強抵抗力。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
