同朱茵洪欣組「港普F4」出道 蔡少芬被爆鍾意嗌人死八婆
全新女團「港普F4」正式出道！
四位「凍齡女神」蔡少芬（Ada）、朱茵、陳法蓉（Monica）及洪欣憑港式口音的普通話（港普）曾鬧出不少笑料，成功在觀眾心目中留下印象。為了延續「港普」傳奇，四姊妹宣佈正式組成全新女團「港普F4」，希望透過特色口音繼續發放歡樂及正能量！日前，她們拍攝首輯造型照，四位女神簡單自然、不加雕琢，沒有在她們身上留下歲月痕跡，也喚起無數人那個充滿經典的時代。
四位好姊妹雖然閨密情深，私底下不時聚頭，但原來在工作上是首次合作。洪欣表示：「我哋有各自分別合作過，有一齊登台唱歌跳舞，但四個人一齊工作合作真係第一次。」Ada不忘發揮搞笑本色稱：「係呀，佢哋三個今次好開心可以同我合作，係對佢哋最大嘅福氣。」對於被封為「港普F4」，她們坦言不介意，更可以互相增加人氣，朱茵說：「其實幾好㗎，一講港普就記得我哋四個人，Ada去拍戲同埋綜藝節目時，大家一聽到佢嘅港普就會諗起我哋其餘三個。」
訪問期間，她們姊妹間的暱稱也意外曝光，朱茵續道：「我哋平時私底下唔會叫咩F4，反而係稱呼大家做『死八婆』！」洪欣繼續爆料，矛頭更直指Ada ：「係呀！係Ada嘅口頭禪嚟，佢叫個個都係『死八婆』，我哋冇名㗎，有時都唔知佢叫緊邊個。」Ada百辭莫辯，引得全場大笑。Monica表示由於她們感情要好，才不會因對方的說話而介懷：「因為熟先唔會嬲，我仲記得嗰陣留長頭髮，Ada話我個妝好似男扮女，佢老公張晉都好緊張話『你唔好咁講啦，Monica會嬲㗎』，我覺得第個講就可能嬲，但Ada 講我只會覺得幾好笑。」
常說娛樂圈如戰場，女藝人之間經常競爭得火紅火綠，提到「港普F4」多年來在工作上的相處之道，Monica表示：「我哋之間唔存在競爭，當大家好好朋友嘅時候，對方接到工作會戥佢開心，可能我有家庭需要，接咗個廣告大家又會戥我開心。」Ada透露最重要是存着大方無私的心，四姊妹之間從未有心病：「我哋四個有樣嘢好，就係都想大家過得好，例如呢個廣告接唔到，Pass比對方都會開心，唔會覺得你搶咗我工作，唔會有心病。」
|
鍾意就快D Share啦！
|
|
|
