香港《國安法》6月30日生效後，不少學者及傳媒人感到不安，陷入「走或留」的兩難選擇，昨日有報道指，資深傳媒人潘小濤已向商業電台辭職，8月7日將是他在叱咤903時事評論節目《在晴朗的一天出發》最後一日上班，引起部份網民揣測，是否政治打壓，還是潘小濤考慮移民！？
林海峰、潘小濤、阮子健今日如常主持節目叱咤903《在晴朗的一天出發》，林海峰甫開始：「資深傳媒人潘X濤唔撈嗰個台，話未來一段時間環境係艱難嘅，當然喇，以後朝朝8點，佢屋企人就要對住佢兩粒鐘，喺度行行企企，又唔可以轉台係艱難啲，拭目以待。」林海峰叫潘小濤自己解釋一下，阮子健笑言：「估到向你開刀。」林海峰指坊間沒太多新聞報道，大家都在談新城知訊台高層程凱欣初步確診，潘小濤原本打算星期五才宣佈此事，林海峰續道：「你點知聽日仲使唔使返工，世事你估預料得到咩，呢單嘢邊個漏出嚟先得㗎！」
潘小濤自言醜婦終須見家翁：「有諗過星期五，或者最後last day先講，咁當然冇嘢，星期日晚上6點半仍然係有商業一台《串》、星期一晚上仍然係有《串》，正經講就係離開二台《晴朗》，好唔捨得！就係咁囉。」林海峰接着說：「就係咁咋！咁就講完喇？」潘小濤搞笑問：「你唔通想我喊呀！你就想呀。」阮子健又講笑：「你又係，一開波就搞啲咁嘅嘢，叫佢講，一陣佢真係喊，我哋處理唔到，佢啲淚腺好發達。」
潘小濤亦不知道為何消息會傳出來，林海峰及阮子健昨晚已收到報道，笑言睇到有人寫「黃絲抵死」、「成功爭取」，他們笑笑口叫這些人別開心得太早，比較少人留言講不捨得他，他們與潘小濤老友鬼鬼，chit-chat揶揄了一番，他們拖延時間一段時間，潘小濤決定等到last day離開二台先講，林海峰笑稱潘小濤近日比較開心，感覺如釋重負，阮子健亦譬如他像老運動員玩完最後一次體操的感覺，潘小濤直言：「《晴朗》冇咗我，我覺得係一個損失。」
之後潘小濤即哈哈大笑，林海峰及阮子健一唱一和：「你知唔知而家廣播道天黑，知唔知點解領事館要撤走，因為噚晚收到潘小濤唔做商台，佢就燒咗啲文件。」潘小濤又笑言：「你知唔知領事館燒嘅係我嘅contract嚟。」林海峰稱應該要燒那些投訴信，潘小濤續道：「都唔捨得！」問到是否賣樓想移民，潘小濤亦未有正面回應。
潘小濤自港大畢業後便任職記者，曾於《蘋果日報》創刊時任職中國版記者，為香港資深中港時事評論員之一，他亦效力商業電台十多年，現時主持一周5日的時事評論節目《晴朗》及商業一台主持中國大陸議題節目《串》，潘小濤一向以嬉笑怒罵方式，與林海峰及阮子健笑談時事新聞。報道又指，潘小濤坦言因個人理由辭職，有感作為傳媒，未來一段時間環境比較艱難，對離開商台感到不捨，與商台維持愉快關係下離開，日後仍以客席身份主持部份節目，據報道稱自去年反送中運動，商台曾收到對潘小濤發表言論的投訴。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|