現年37歲的印度裔香港演員陳振華（Ricky）近年活躍於香港各大電視台，曾參加ViuTV真人騷《兩面不是人》回到家鄉印度，擁有印度人外貌的他卻只會廣東話，陷入身份認同的矛盾；亦曾參演大台多部劇集，當中以《金宵大廈》中飾演南亞裔警員而為觀眾熟識。
Ricky與同母異父的兄長陳彼得均由同鄉喬寶寶介紹入行，由於南亞裔演員在香港演出機會不多，Ricky曾於節目上表示自己以髮型師為職業養妻活兒，空閒時才投入演藝副業。不過，今日Ricky太太於網上撰寫千字聲明澄清，並指摘Ricky為人相當有問題，字句當中憤怒難擋。
Ricky老婆Alison今日撰文，指Ricky在外到處借錢並將責任歸究於「老婆成日攞佢錢」，Alison於文中首先大爆Ricky在外偷食「北姑」，就算銀包剩下10蚊亦會被Ricky攞盡上大陸，政府資助、囡囡利是錢、朋友接濟等錢銀全被Ricky袋晒落袋，「我同個女食都冇得食！學費你唔交累到個女冇書讀要退學！」更試過冇錢食飯要去朋友餐廳求助，又指摘Ricky「食咗件北姑就講衰自己老婆」，更表示：「同你捱咗咁耐換返嚟就係呢啲？為咗隻廣州雞棄埋個女都算，仲要同人哋唱完我再唱衰個女，你有冇人性㗎！」
之後Alison大數Ricky罪狀，形容Ricky在外建立顧家形象，實質多年來只在分開前數月給予過約2萬元生活費然後不知所終，指摘Ricky扮勤力呃記者訪問，事實上有工開亦會懶得去，Alison勸喻要飲水思源回覆fans，Ricky卻一切懶理，更大爆Ricky早前與容祖兒拍攝廣告時晒大牌「同Joey拍廣告，人哋Joey拍咁長時間都未發脾氣，你喺片場發晒爛渣同我講話要X人，又叫人拍你先！話人阻住你返大陸拍嘢！態度又差！唔知真係以為你係國際巨星連Joey都差啲要行埋一邊讓你拍先！」
至於家庭方面，Alison的指控更為嚴重，「出世咁耐你一件玩具都冇買過畀個女淨係送過一包糖咋！個女記到而家呀！嗰隻糖你個女以前唔食㗎！因為你佢鍾意咗呢隻糖，話你買過畀佢！成日都叫我買！因為佢好開心係你送畀佢！」又表示：「唔好再講到自己咁委屈話我教個女趕你走！首先個女冇趕你走，你要仆倒去搵隻北姑唔返屋企係你嘅事！唔該唔好再同人老作！第二係你自己對個女衰令個女討厭你！係邊個掉低個女一個人喺餐廳走咗去，最後要餐廳嘅人打嚟搵我我先知道？！係邊個打到個女流血？！係邊個成日打個女個頭話個女賤？！係邊個一巴巴打落個女度！係邊個成日講粗口鬧個女嚟威脅我？！」
Alison表示，Ricky在外有第三者一早收到風，「你登台係女都撩又身體接觸，咁我都唔係盲㗎！一個瞓係自己隔離嘅人180度變我唔會乜都唔知吓話！」又說明撰寫千字文的原因，更隔空叫Ricky回港離婚：「本來冇得罪你，只係因為你自己有北姑而分開，你都可以癲到連公屋都特登取消埋唔畀我同個女！係你當咗自己大明星之後就去叫雞呀！收嘴唔好再抹黑我同個女！同埋麻煩盡快回港辦理離婚手續！」
最後Alison更呼籲：「本人跟件垃圾香港印度裔演員陳振華先生早已分開，並沒有見面及聯絡，佢最近喺出面周圍問人借錢走晒嗰啲數與我無關，我建議咁多位最近不約而同地曾經搵過我嘅受害人報警。」
翻查資料，Ricky的演員哥哥陳彼得曾於2014年被喬寶寶公開指摘借貸5位數字不還，他曾坦白回應傳媒查詢表示：「未還啫，邊個話唔還。」
《蘋果》曾就事件分別聯絡過Ricky及Alison，但未獲回覆。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|