66歲的肥媽（Maria Cordero）和葡籍老公Rick結婚21年，3年前Rick發現患上肺腺癌尾期，肥媽不離不棄照顧，除要為600萬醫藥費奔波，家人又因不同政見起爭執，曾令肥媽壓力爆煲喪喊。其後老公病情好轉，肥媽亦致力在社交網拍片教煮餸。惟昨晚肥媽上載一條身在病房的短片，原來老公因肺炎和血管閉塞入院了。
肥媽指收到好多朋友關心和慰問，所以拍片報平安，「我呢個幾禮拜喺度不停抹，門口都唔出得，你明唔明白，我呢度消晒毒啫，門口好多菌，我哋入嚟之前要撩鼻（鼻液測試），每7日做一次檢查，即係我同老公冇COVID-19（武漢肺炎）。」片中見到肥媽老公正在睡覺，「上個禮拜我真係癲，睇到老公辛苦，我都頭痛，今朝醫生話佢樣樣都好，睇佢瞓到好似bb咁，我就舒服，所以人要活在當下。」肥媽還將病房佈置成有工作間、廚房、士多房，笑指自己每日在病房中行來行去，「惟有喺呢個空間打圈行，冇辧法，人要令自己開心。」
《蘋果》致電肥媽了解，她說：「佢又血管閉塞又肺炎，入咗嚟個幾禮拜，但佢有cancer，肺炎對佢都好大影響，因為係尾期cancer，好在一直冇發，腫瘤縮細緊。而家有三個醫生睇佢，但啲血塊唔可以溶得太快，驚佢腦充血，另外佢又背脊神經腺發炎，成隻腳都痛。我梗係擔心，日日喺醫院瞓，瞓到腰骨都赤埋，噚晚打風返去睇啲狗，今朝一早返醫院。」記者叮囑她小心身體，肥媽說：「得啦，呢啲女人做，唔緊要，我整嘢畀佢食，佢好食得，同埋有好多朋友幫手煲湯，多謝關心。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|