網紅英文教練馬米高，早排出書，其中章節《娛樂照妖鏡》及《Seafood看人低》，道出他在大台做大茄時的點滴，再化成英語教學，真的活學活用。
他說，正正因為在大台屬毫無地位的二打六，故「偽人」對著他，如照妖鏡一樣，德行原形畢露。
當中引起注意的分享事件，是遭受兩名同劇的資深女藝員白眼兼冷言冷語對待，雖然他以揞名爆「Old Seafood」及「Seafood」表達，但從蛛絲馬跡，筆下蝦蝦霸霸的兩位女演員，滕麗名與呂慧儀是大最嫌疑。
日前馬米高接受專訪，他說入行後，才知星爺經典之一的《喜劇之王》情節，在娛樂圈真有其事。
「戲裡見到所有茄喱啡係點樣俾人踐踏，點之入行後，發覺《喜劇之王》嘅內容係真嘅，我真係遇到相同情況。」
- 據知當日他遭「Old Seafood」女藝員白眼，是拍這場《愛.回家之開心速遞》的外景。
- 他在大台拍劇的早期遭遇，他說跟星爺的《喜劇之王》情節有幾分相似。
一張櫈仔檢測對方品性呈「陰性」反應，馬米高:「我無乜詫異，因為佢真人同劇中角色真係幾似，只係好奇怪點解佢會有咁樣反應。佢嘅表達方式比較戲劇性，始終係一位演員，連做呢啲都有戲。」
學星爺話齋:「臨時演員都係演員」，受了前輩「Old Seafood」的冷嘲，馬米高唯有「good」聲吞落肚。
「當時都沉著應對，我無好抗拒，因為始終我係後輩，都需要虛心受教。」
- 早前爆出馬米高新書提及因一張公家櫈，受女藝員「Old Seafood」奚落，事後被指嫌疑最大的滕麗名，在傳聞追問時竟沒否認。至於書中講到另一位橫行霸氣的「 Seafood」，呂慧儀是頭號嫌疑，之前就傳出她鬧走娛樂新聞台記者。
- 大星櫈坐不慣，馬米高還是愛坐給場務坐的公家櫈仔。
馬米高這樣回禮:「嗰張係公家櫈，我覺得公家櫈就好似關愛座，有禮讓前輩之義。不過關愛座都有其他需要嘅人使用。例如喺巴士上，一個年輕人坐咗關愛座，就會被批鬥，但有冇諗過對方可能真係好攰，佢見當時旁邊無人需要坐嘅時候，佢只不過坐一坐，就即時被批鬥，但佢又都無話唔讓座喎！」
就他個人經驗，訪問中播著夏韶聲的《空凳》應下景:「一張丟空了，無人坐的凳，仍令我再不禁地行近。」馬米高演繹得非常投入，笑爆全場。他日再在錄影廠遇上「Old seafood」，有否留下「凶櫈」陰影？
「有冇陰影？都會有，唔敢再坐，費事唔知道坐咗一個有地雷嘅櫈，就唔好寧願企吓囉！或者自己帶櫈就最好。(出書爆兩位女藝人惡行，若再重遇會尷尬嗎？)我又唔會覺得尷尬，可能佢哋都見唔到我，要向下望先至見到我。」
眾所周知，黃到爆的他，有個極藍的姑姐馬蹄露。立場對壘前，姑姐有否給他在大台的生存錦囊？「姑姐叫我自己醒目啲！之前有同佢吐下苦水，我同佢講完，姑姐會話:『使唔使我同佢講吓！』，我話千祈唔好，我唔係要討回公道。」
一樣米，養百樣人。一劇裡面有「Old seafood」，同樣亦有好品藝人，就如他口中的一位:「書入面有提到一位代號『虎哥』，對方係一個好人，又係一個好正義嘅人。我記得有次同佢一齊拍外景，搭lift落樓下，我唔識死，同佢搭同一部𨋢，心諗同lift無咩問題。但有位臨時演員就唔肯入嚟，我同『虎哥』叫佢一齊，佢死都話唔好，講咗句:『大明星唔鍾意同其他人一部𨋢。』，『虎哥』話佢傻嘅，每個人都可以搭lift;，我覺得呢啲就係風範、星味，而唔係高高在上，要其他人去崇拜，我覺得尊重係要自己賺番嚟，呢啲真係好賺到我嘅尊重。當時提醒自己，將來若果有幸出名，就要好好學習對方咁，記得唔好令自己變成唔新鮮嘅Seafood。」他揞名爆的「虎哥」，相信就是圈中人稱「豹哥」的單立文，《愛‧回家之開心速遞》的「熊樹仁」。
他口中有品藝人，還有演「大小姐」的林淑敏，對新人冇架子的陳豪，及肯教導後輩的王祖藍。
- 拍劇遇過蝦蝦霸霸的女藝員，同樣也認識親和的演員，其中一位是林淑敏。
- 書中提到一名為人正義，揞名爆的「虎哥」，不難估到是「豹哥」單立文，馬米高說他沒有架子，更不似一些一線演員，介意跟臨時演員同lift，或同場休息。
「扮死屍經歷好似《喜劇之王》，我問導演要點樣死？因為嗰場戲我唔係就咁死，我就去問導演之前，要先打個招呼，等佢唔好淨係叫邊個邊個，因為有時候真係唔知道「邊個邊個」係指邊個？不過介紹完自己，通常佢哋都唔記得。
有日拍劇集《殭》，我同導演介紹自己係馬米高:『今日我負責扮死屍，想問吓應該點樣死？』好似《喜劇之王》咁樣，導演就會話:『咩嘢點樣死呀，咪咁樣死囉！』，我話無問題。知道導演原來鍾意臨場先會要求演員點樣死，所以唔好問咁多問題，到時候自己執生。」
- 在大台做大茄的日子，怎少得演「死屍」的日子，「死屍」角色又給他一場難忘體會。
「嗰個經驗其實都幾特別，死喺一個冬天嘅地上，全身震晒，因為好凍，然後導演問我點解震？我話地下真係好凍，不過正式拍攝時我會控制到，唔會震。因當時我震得好真實，加上我角色又係需要掙扎一輪先至死，於是導演叫我繼續震，覺得我震得唔錯，拍攝時我就真係震，真係凍到震，全身抽搐。
扮死屍唔係就咁死响度，死都需要閉氣，或者一啲動作同表情，係有好多細節位，同埋死人化妝其實比女主角個妝，還更需要功夫同心機，既然背後團隊喺一個死人妝上花咗咁多心血，自己覺得死人角色都要演好去。」
- 他演「死屍」的劇集，是謝安琪當女主角的《殭》，他說當日跟阿Kay做對手，會一起研究點演繹由垂死到死去的動作，真係學星爺話齋:「由內到外，再由外到內。」
「教書時希望俾學生知道，除咗死板嘅書本以外，其實仲有好多有趣途徑學英文，所以我不時準備生活化嘅教材，例如聽Taylor Swift嘅MV，學習tense。或者睇吓BBC嘅紀錄片。
我記得有次教書時，播放Lady Gaga嘅MV，佢啲衫好少，訓導主任經過，睇住我上堂，我心諗點解會有訓導主任望住，唔通我好厲害？望番後面部電視，原來Lady Gaga著住三點式揸電單車，發覺咁樣可能有啲敏感。」
- 教育學院畢業後，曾在Band 1及Band 3任教，以他性格，就估到當日執教鞭的他，是麻辣教師。
佢哋覺得我教嘅同之前老師唔同，無嘢抄寫，即係無一張工作紙或者筆記，覺得學英文，就係為咗考試，唔係為興趣。
不過亦有啲似我嘅學生會好受落，由佢哋起初唔係咁鍾意，到之後發現，透過呢啲唔知咩嘢嘅教材，考試時都會用得上，只係需要一啲時間適應。」拿著自己本英文寫真，馬米高揭開一頁，一位老師寫給他的序，他說:「老師曾經講過馬米高唔適合做老師，因為諗嘢好跳格，唔適合做老師，所以選擇跳出呢個框框。」
- 離職前學生給他的評語，跟他教英文風格一樣，夠抵死！
- 教育學院出身的馬米高，當實習教師的半年，棄墨守成規的教學方式，反以美劇或一些外國紀錄片做教學題材，連給學生的練習，也是玩味十足的填寫美劇及電影名字，提升學生對英文的興趣。
當日如果他沒走，仍是教師一名，相信他必是楊潤腸眼中的「黃師」，相沖！
攝錄:Steven Wu ----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|