世上「壞咗嘅男人」何其多，林雅詩（Grace）唔好彩，遇到兩個，包括前夫溫文英和舊愛馬天樂。林雅詩不得不認，自己在愛情路上是個失敗者：「唔識揀男人？係㗎，我好容易相信愛情，鍾意一個人就會放好多感情落去，好想有人錫。」
Grace自幼在單親家庭長大，一直好想組織自己的家庭及生小朋友，2005年跟經營鋼鐵生意的溫文英奉子成婚，結婚10年，老公被影到街頭啜人妻，之後為爭兒子撫養權對簿公堂，一度情緒崩潰。想不到，離婚後與經理人馬天樂拍拖3年，早前又發現對方跟「師奶型」女助手搭上，並育有約兩歲兒子，提起第三者，Grace即氣上心頭：「時間（拍拖）有冇交叠我唔知，但如果佢哋一齊先，佢仲唔惡過我咩！一開始簡直唔敢相信，因為佢係馬生助手，成日喺我哋身邊出現，今年6月派口罩時，佢仲若無其事陪我出活動，我覺得呢個女人好恐怖，如果我係小三就真係唔得啦，會醋罈，點得呀，做女人做到咁！」
事件揭發後，Grace和女助手還約過見面「攤牌」，她不屑地說：「係咪逢小三都咁，一大堆廢話，仲話要多謝我，因為我同馬生嗌交，令佢有咁嘅機會，我真係血都嘔埋！所以我一定唔會演狐狸精角色，個心唔舒服。」Grace選擇全身而退，直言不再相信愛情，未知將來會否再跟馬天樂合作，她說：「馬生一路都有開戲，之前簽畀佢都係想轉型做打女，大家合作OK，我都唔想因為感情影響工作，大家都係搵錢啫，之前簽落嘅廣告因疫情hold住咗，睇吓之後可唔可以完成。」
男人可以放下，Grace最緊張是15歲的兒子。離婚後復出拍寫真，她直言最初沒有信心：「因為一把年紀，生過仔又離埋婚，點同一班後生女鬥。但慶幸寫真好爆，都幾好賣，自己亦有返啲信心。」可惜近半年受疫情拖累，令演藝工作停頓，時裝店生意又蝕入肉，令她雪上加霜。「身為single mom真係好大壓力，間時裝舖營運咗兩年，之前社運都可以接受啦（生意），疫情真係出血，最差一日賣得一兩件衫得2、3百蚊，租金6位數，未計貨錢同人工，只有1個月獲減租3、4成，都幫唔到啲乜。」重重壓力，為發洩心中不快，Grace早前在社交網貼上安眠藥加紅酒相，令大家擔心其情緒問題。面前的Grace卻表現樂天：「我個人好衰，唔開心唔會跟家人同圈中姊妹講，但我份人好直，唔鍾意就爆，而唯一渠道就係放上社交平台，呢個係我一個壞處，忍唔住就令大家擔心，有朋友問過使唔使睇心理醫生？但我覺得還可以，因為有朋友開解。」
Grace在1997年參加港姐加入娛樂圈，在無綫1年便離巢，曾在《邪教檔案之末日風暴》與古天樂有一場肉帛纏綿的床戲，一度傳出緋聞。她直言揀錯一條三級女星路：「嗰陣喺外國返嚟，唔覺得有乜特別，去外國沙灘好多人都除晒，我嗰時係咁諗。但喺香港，世俗眼光唔係咁，如果我仲係單身冇問題，但到我生咗小朋友，佢（兒子）又慢慢長大，已經15歲，雖然冇質問過我，但網絡世界好大，即使佢唔識睇中文都睇到，我都要同佢解釋，叫佢更加要努力讀書，唔好學媽咪咁。」Grace透露兒子學業成績不俗，還有遠大理想，希望將來可以做科學家，說時已甜在心，縱有萬千煩惱都能拋諸腦後。
採訪：嵐山
攝影：沈健程
攝錄：廖達燊
----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
