政府今日在禮賓府舉行勳銜頒授典禮，一向以「唔知」、「睇唔到」、「我唔信」撐警的陳百祥（阿叻）獲授銅紫荊星章。去得禮賓府受勳，阿叻當然要着得得體啲，今日佢就以一套黑色軍閥feel套裝現身，不過卻被眼利嘅網民發現，原來淘寶都有類似嘅衫賣，而且只係賣248人仔（約291港幣），勁抵玩！
在政府新聞處所發嘅片段中，一向嬉皮笑臉嘅阿叻，喺受勳時表現卻異常認真，由於疫情關係，阿叻受勳時亦戴上口罩，不過呢，阿叻就唔係用佢最支持嘅特區政府派發嘅「銅芯」口罩，而係戴咗個有花紋嘅口罩，似乎有啲唔畀面。嗱，再睇返阿叻套疑似淘寶裝只賣248人仔，真身其實係出自Yohji Yamamoto 2019秋冬系列，原價356,400日元（約26,411港幣），連大陸男星吳亦凡做節目時亦曾經着過。當然，同一套衫，阿叻同吳亦凡邊個着得型啲，就真係見仁見智喇！至於阿叻嗰套係淘寶貨定係Yohji Yamamoto出品，就要問返佢本人先知。
另外，阿叻係今年唯一一個娛樂圈嘅人獲得勳章，當然要大肆慶祝一下，黃大仙嗇色園就登報祝賀，不過唔講唔知，原來身為資深會員嘅阿叻有個朵叫「吾知道長」，連個朵都叫「吾知」，難怪佢之前同杜汶澤上港台節目《視點31》時，對有關反送中運動處於「我唔知」、「我睇唔到」、「我唔識」狀態。
據資料顯示，其實阿叻做「吾知道長」前，要先修讀道教文化班同通過面試，更要接受一連串考核，先至可以升格做道長，而道長亦有義務推廣黃大仙信仰文化，以及協助處理嗇色園事務。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|