藝人曾偉權今日傳出肺癌病逝消息，一直照顧他的契妹Sasa連日未有回覆傳媒。到今天晚上，Sasa終於在曾偉權好友鄭敬基的YouTube頻道，證實曾偉權離世消息。她說：「各位權權嘅朋友、影迷、傳媒嘅朋友，你哋好，我係Sasa，連日嚟辛苦大家守候啦，宜家我有一個好傷痛嘅消息，會喺權權嘅好朋友鄭敬基Joe哥嘅平台宣佈，曾偉權喺2020年11月12號星期四嘅早上，喺我同我屋企人同好朋友嘅陪伴下，已經安詳地離開咗我哋，享年59歲，佢返回天主嘅懷抱，得到永生，再冇痛苦」
Sasa指在這兩年中，曾偉權好勇敢去作戰，一直沒有放棄和畏懼過，在他病患期間，亦不忘照顧貓狗，宣傳動物的權益，在她的心目中，是一位戰士及令人敬佩和學習的人。她透露曾偉權生前曾向她透露死後遺願，指希望後事一切從簡。她說：「權權喺生前交帶落，萬一佢不幸離世嘅話，千祈唔好同佢設靈，所以我都要尊重佢嘅意見同遺願，識佢嘅人都知佢好怕嘈吵，好怕應酬，好怕煩到人，佢係一個比較鍾意寧靜嘅人，所以我都希望大家去諒解，佢話如果思念佢，就為佢祈禱，將思念變為愛嘅力量，成全佢繼續為流浪貓狗爭取權益，將佢嘅遺願延續下去。」
Sasa又表示感激名醫護人員對曾偉權的照顧，以及感激家人、朋友、上司等人體諒自己，而她又特別感謝古天樂、歐瑞偉等人幫忙：「排名不分先後，有古天樂、陳煒、姚嘉莉、同埋歐瑞偉，另外，一定要提嘅係鄭敬基，因為喺權權做手街嗰陣時，佢同太太差唔多每隔一日就會嚟探權權，仲要煲埋湯畀權權，到出院嘅時候，佢都成日嚟探望我哋，仲幫我哋托日用品過嚟，Joe哥成日都開解我，係一個好好嘅聆聽者，我喺佢身上都學到好多嘢，我真係好感激佢。」
當Sasa提到家人時，語氣變得有點激動：「喺我最需要幫忙嘅時間，佢哋（Sasa家人）總係會出現，支持我同權哥，我真係好感恩。權哥都同我哋講『好彩有你同你嘅家人冇嫌棄過我咋！』我哋點會嫌棄你？因為你係我哋嘅一家人。」而Sasa表明以後不會再回答任何問題，希望大家可給予空間讓她辦理曾偉權後事，讓他能入土為安。而她最後亦祝大家身體健康及再一次多謝大家。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|