達明一派歷年來唱過不少諷刺社會時弊的歌曲。在自由言論不斷縮窄的環境下，經歷重重困難，曾令2017年的演唱會找不到贊助商，經過去年的社會運動，達明一派更堅持自己作風，本月中舉行的演唱會，將重唱30年前專輯，為歌迷設立渠道宣洩鬱結。黃耀明揚言不能退：「限聚令下，我哋唔可以喺街頭connect，但我哋可以喺音樂上connect，保持一種士氣，保持團結，我哋要更加有智慧同更聰明，但唔可以收聲。」
原本打算在去年12月舉行演唱會的達明一派，曾因社會動盪而決定延期，後來碰上疫情再度改期，本月終於可以在伊館舉行。黃耀明接受《蘋果》專訪時表示，演唱會名為《Replay》，計劃最初是在一年內舉行兩季演唱會，從新演繹達明一派出道以來的8張大碟，因多次延期下，現選定主打的兩張專輯為《神經》及《意難平》，其他唱片的演出，明哥笑說：「後會有期。」
如今舊曲新唱，明哥透露將獻唱從未公開表演的歌曲，就像回顧自己以往經歷：「我覺得到呢個年紀，係懷舊或睇吓自己過去嘅歷史，同埋發覺做咗好多嘢但冇人理、冇人現場聽過、你從來冇表演過，我會覺得奇怪。我proud of我哋達明一派做過嘅，大部份作品再拎出嚟聽唔會難堪嘅。」同時明哥亦有新歌推出，讓樂迷驚喜。
一直以來，達明一派歌曲題材前衞，亦勇於在政治表態，1989年推出《意難平》時，社會氣氛和諧，仍未發生六四事件，他說：「潘源良第一次畀《四季交易會》嘅歌詞，其實好有趣，講北京民主牆，好多人貼出自己對社會、政治嘅訴求，你會覺得好奇怪，80年代喺北京仲可以做呢件事，有少少似我哋嘅連儂牆，但睇今日嘅北京乜都唔可以。當時我嘅音樂唔係要啲咁硬嘅，之後變咗而家嘅版本，講緊一個華人社會，或中華民族嘅民族性嗰種對理想唔執着，理想隨時可以買賣。」之後明哥更提到《愛在瘟疫蔓延時》，寫的是愛滋病：「填詞人周耀輝就想用呢個題目講世界上有好多恐懼，政治都係種恐懼。80年代後期，點解會有《我等着你回來》、《你還愛我嗎？》呢啲專輯，都係因為我哋對未來嘅恐懼。」
香港經歷了去年的社會運動，到今年相關人事被秋後算賬，達明一派在這個時期重唱充滿控訴的歌曲，也許令人更感沉重，明哥苦笑：「其實係好大諷刺，好似而家比嗰陣時體驗更深，更加真確，而1990年出嘅《神經》更恐怖，就好似預言30年後再發生，原來歷史係有一個循環。」
《天花亂墜》最尾一句歌詞「我諗，我應該收聲」，這句會否是明哥現時在困局下的心聲？他堅定的說：「唔會，冇得收聲。係驚，會驚好多，我哋要更加有智慧同更聰明，但唔可以收聲。」他形容社會狀態加上疫情提供了豐富的創作題材，但恐懼令創作路有如在踩鋼線：「以前都踩鋼線，但好似容易啲，寫呢啲歌大陸唔批，或者大陸版本會cut咗，但而家唔係，你寫咗隻歌唔知會唔會俾人拉喎，因為《國安法》係好任意、抽象，究竟你寫咗啲乜、唱咗啲乜會犯法？嗰樣令個個都驚，大家都知有個寒蟬效應。但喺咁嘅時候更要面對，如果一路退落去，香港所有做創作、文藝嘅人，只能服務嗰個政權。」
明哥形容以他們的個性和音樂路上方向，於這時候很難不回應這個時代：「其實過去十幾年，我都可以返中國大陸演出，大部份歌可以演出，除咗拎走咗嗰幾首，佢畀我錯覺以為中國大陸社會進步，點知突然一切嘢倒退。我覺得好奇怪，一個所謂強國，點解喺文化、藝術上，反而箝制住？我覺得係不能理解嘅事。」
1997年香港出現移民潮，近來香港人再次出走，明哥好友羅冠聰和林夕轉移基地：「好愛香港嘅人，要走係好慘，係我哋死都要留喺度。曾經喺反修例前，我諗過一把年紀時，如果我遲啲唔係好活躍工作時，所謂半退休時，要唔要喺香港生活呢？但反修例運動後，我唔到最後一步唔想走，除非係好惡劣，希望喺度繼續撐到幾耐得幾耐。」不過，「最後一步」會是甚麼程度，他卻說：「唔知，係咪要坐監就要走？唔知㗎﹗係咪坐一個星期監就唔走？一個月就走？唔敢應承自己或大家，我都係會驚，但我唔想走。大家唔好送頭，大家要鬥落去，要再有智慧啲。」
就算再不關心政治的香港人，去年也避不開看到直播新聞，每天看到熟悉的地方烽煙四起、不同程度的暴力，站於任何立場，也會不忍心去看，有很多人情緒難平，心有鬱結，明哥也慨嘆，反修例後加上疫情，衍生出來的限聚令，使香港不能上街表達訴求。而去年持續半年多的抗爭片段，每日上映，他惟有靠音樂發洩：「繼續唱歌、寫歌，中間有幾次開FB Live，因為頂唔順，無論香港人或者我嘅歌迷，都想有一啲渠道，抒發佢哋嘅鬱結、苦悶，我好想快啲有新歌或有演出，大家唔可以喺街頭connect，至少喺另一個方式，喺音樂上connect，我哋保持一種士氣、保持團結。」
撰文：王連連
攝影：仇志德
攝錄：沈健程、馮嘉銘
化妝： Kris Wong
髮型： Ivan Lee@headquarters
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|