洪金寶講嘢一向直腸直肚，為娛樂圈中嘅大哥大，上半年香港疫情嚴峻，政府堅持不封關如無掩雞籠，更離奇有廿萬名獲豁免檢疫人士致第三波疫情爆發，當時洪金寶形容「寡母婆死仔」冇晒希望，怒斥港府抗疫不力。目前留港的洪金寶，都聽兒子天明講，盡量減少外出。
早前譚詠麟在網上貼出洪金寶近照，見他忽然暴瘦，事後他解釋因血糖踩界要戒澱粉質，體重保持在180斤（約198磅）左右，新抱周家蔚稱老爺係用「168斷食法」健康減肥，只係膝頭哥有啲唔好，有時要人扶住行。
68歲洪金寶日前在阿旦鄭丹瑞的網上節目亮相，見他臉色紅潤，精神不俗，講嘢仍中氣十足，跟今年5月與好友聚會時，明顯身形不同，他在節目中跟阿旦講起做武打演員生涯嘅辛酸，正所謂拳腳無眼，好多時親身上陣難免會受傷，阿旦回想有一次去探班見到二百幾磅嘅洪金寶，喺唔需要助跑嘅情況，輕鬆示範打後空翻，洪金寶笑言：「我一啲都唔記得，因為呢啲場面太多，哈哈！」
阿旦問到膝頭哥嘅傷患如何造成，洪金寶直言因長期受傷勞損，之後做過手術，唯一就仲未換膝頭哥，總是擔心會好大陣仗，怕以後做唔到一啲又踎又踢嘅動作：「一條彈弓你不斷咁樣彈佢，彈弓都鬆啦，由最早期拍武俠片，我哋由幾高都照樣跳落嚟，下面都全部冇墊，嘭！嘭！嘭！呢啲壓力及逼力都好厲害，同埋我自己拍戲嗰陣，又曾經受傷，膝頭哥撞落石頭，太多呢啲環境。」
洪金寶指以前為生活冇得錫身，要餐搵餐食餐餐清，自己有咩本事同能耐就要瞓身表現出嚟，武師係拼命去做，「視乎佢有幾多料，我先會叫佢哋去博，如果佢冇料，就唔會叫佢哋夾硬嚟。好似要諗點樣喺巴士門口跌落地下，撻落馬路啲混凝土瀝青係尖嘅一粒粒，一擦落去就成隻腳都受傷，我哋都照做，後期都未有榻榻米，係用禾桿草上面鋪帆布就撻落嚟。」
洪金寶回想有次去韓國拍吳宇森執導嘅《少林門》，他續道：「嗰陣成龍同元彪都跟我，有個鏡頭大約15尺咁高，嗰啲客棧走上2樓，仲要有欄杆，要搵人擰歪臉背住下面個鏡頭，樓下仲要有一張古代四方枱，要被打一拳，畀完反應即扭過欄杆，打一個筋斗前空翻，啪一聲跌落下撻爛張枱，當時冇人願意，唯有我嚟，演完我成個人跌到大約十尺外，我當時叫『你唔好郁我，你一郁我就標喇』，就係撻到標屎，要忍唔住唔好講嘢，等嗰啖氣過咗就冇事。」
佢指師傅兼師兄係韓英傑，當時老大邊個企出嚟，一眾做細嗰啲都二話不說係咁試，由導演決定收唔收貨，「最後導演叫三毛（洪金寶）你走開唔要你，佢話每個鏡頭都係你，死咗又走出嚟……後來我做指導就會睇邊個有咩料，『你唔好同我詐諦』」。
之後阿旦問佢知唔知自己傷咗幾多個地方，洪金寶即笑笑，撻大手板：「我就知道而家自己已經冇料，哈哈！傷就傷晒，我兩隻手斷過三次，最後嗰次斷手腕位置，當年拍《最佳福星》，前一段係劉家良師傅度嘅，要同劉德華仲有唔知邊個對打，之後就我衝出嚟同個日本人打，我喺兩級樓梯高，撳住呢邊『起雙飛』雙腳向前踢，佢跣得快啲，我一撻落地，叫再嚟多次，我話『唔得喇！我隻手斷咗』，即刻去法國醫院打石膏包紮再返片場繼續拍，好多人嚟探我，當時等睇醫生，護士出嚟問我痛唔痛，我話好乜痛，佢問我做咩有講有笑，我話唔通喊咩，因為我第二日要去加拿大，要影手就要用替身，同麥嘉玩俄羅斯輪盤。」
洪金寶做訪問時都忍不住周身郁，手腳仍然靈活，笑言自己仲有少少戲，有時如果要拍戲就要紮實條腳，紮到麻木咁去做動作，洪金寶亦霸氣兼不失幽默作風：「家人冇得勸，我哋幾十年到而家都係咁，由老婆識我都而家，生活、食呀都係我博返嚟，如果以前唔博就乜都冇，我而家唔係唞，遲少少就可以『長唞』，哈哈！好多人叫我退休，我會諗點解要退休？第一我仲講到嘢，可以鬧到人，第二我諗到嘢又講得到，咁我點解要退休，咁上天畀我呢啲嘢做咩啫，當覺得自己真係退化晒，咁自然費事出醜，我唔係唔想退休，只係想真係做唔到，我先退休，而家仲有機會嘅，我都想盡量去做。」此外，問到洪金寶是否減肥瘦了，洪金寶搞笑說：「個個話我瘦咗就瘦咗囉！」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|