現年51歲的前港姐冠軍莫可欣，在2008年與方中信結婚，婚後生了囡囡符迦晴。雖然莫可欣令方中信從浪子變成好老公兼廿四孝爸爸，不過依然有不少人「睇唔過眼」，認為她的外貌配不上對方，但她一於懶理，繼續專心相夫教女，而方中信亦多次為老婆護航，讚老婆的大方與包容，以及對他的了解程度，是他最為欣賞的地方。今日莫可欣為好友林穎嫺的YouTube頻道擔任嘉賓，提到夫妻相處之道，她說：「當年離開TVB之後，我哋已經一齊，到而家有20幾年，呢樣嘢真係keep，我哋都唔係日日風和日麗，好多拗撬。」
莫可欣續說：「兩個人一齊咁耐，實有啲嘢係唔啱傾，尤其係我哋喺工作方面係咁唔同，大家嘅步伐都好唔同，如果要維繫，真係大家都要遷就，通常都係佢鬧交，我唔係好鍾意同人鬧交，最多都係黑面，但係都會去到一個點係覺得好辛苦。之後同佢講佛偈，用佛經去解釋呢樣嘢，其實我哋而家嘅夫妻緣，可能係前世有啲嘢未還到畀大家，所以咪今世還番畀大家，所以不如今世大家對大家好啲，還晒啲債，希望來世大家唔好再做夫妻，咪唔使還債，可以做返普通朋友。」
言談間莫可欣亦提到當年選美的經歷，她表示當年給5年時間在娛樂圈工作：「嗰陣試過拍戲，最記得《真情》，係多人睇，不過我覺得自己啲戲好渣，一啲都唔識做戲，本身冇呢樣才能，唔夠放，代入唔到角色，變咗入唔到戲，之後做咗幾年《K-100》主持，係一個好好嘅經驗，試過有人寫信話我有懶音，提醒我要改善，可能因為少講廣東話，咁我咪鑽研吓，讀吓報紙。」
最後因為發展不似預期，莫可欣決定離巢外闖：「好多朋友話大膽，我做過好多份工，試過去咗一間建築物公司做大老闆嘅助手，陪佢去歐洲傾生意，不過做咗3個月冇做，可能係朝9晚5唔習慣，試過返公司打完咭，入咗廁所瞓20分鐘覺，之後自己搞生意，做過形象顧問、紅酒代理，跟住去咗《MTV》做PR，呢份係我嘅dream job，一做就做咗7年，係最精采嘅7年。」
至於有否想過復出，莫可欣坦言有想過：「始終曾經係女強人，停咗落嚟唔係好習慣，喺個女3歲嘅時候想出嚟，但係好坦白講唔係咁容易，喺工作方面經歷咗咁多嘢，最緊要都係屋企，於是咪搵啲生意做吓，試吓做slime（俗稱鬼口水），估唔到呢樣嘢咁受小朋友歡迎。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
