【《造星III》決賽花絮】 否認跟丁悅撻着 Timo睇晒連登負評:我唔係咁邪惡㗎
Timo（江宏基）在《造星III》10強止步，他望着總決賽舞台坦言感可惜，對於外界指其成績受負評所累，他反指是自己心理質素差，被外界言論動搖，又坦言參賽令他學識慎言，未來會繼續向演員路努力。談到跟另一參賽者丁悅傳緋聞，他澄清兩人只屬好朋友關係，不是拍拖。採訪：杜淑霞、廖思慧
Timo對於未能踏上10強的舞台感到可惜，「有少少可惜嘅，唔可以一齊玩呢個比賽，雖然自己都有份參與一part，但都想可以個人身份表演。」一直夢想做演員的他，現在有積極進修，「都有學唱歌，但呢個唔係我首要項目，我入《造星》面試時都講，想做一個演員，𠵱家繼續學演戲同埋拍嘢。」Timo當晚亦收到彭秀慧送給ＢTeam學員的禮物，男組員是PANDORA手繩加補夢網吊飾，喻意「follow your dream」，手繩特價274港元一條，「靈性捕夢網串飾」就499港元一個。全隊B Team有6個男組員，總數4638元。
因為連登有大量瘋狂追擊Timo嘅Post，問到《造星III》成績是否受網民負評影響?Timo反而認為是自己做得未夠好，「我心理質素唔夠好，呢個係真嘅！一開始我都有心理準備，喺呢個節目度會受到一啲批評，或者一啲唔好聽嘅說話，當真係嚟到嘅時候，自己原來仲未ready接受呢樣嘢。」他坦言為更了解外界觀感，每個連登負評Post都有睇，「我全部都有睇，（有啲都幾hurt？）係㗎！我真係睇晒，因為我真係想知道自己究竟做錯啲咩，人哋眼中嘅Timo究竟係點樣？當然係自己衝動講咗啲說話，但係好想大家理解番我唔係一個咁邪惡嘅人，網民覺得我好似Team B嘅邪惡大佬咁樣，其實我冇呢個特性，我輸咗嘅時候，都有製作組喊，戥我唔開心，大家誤會咗，我鏡頭下唔係咁嘅人。」
不過Timo坦承這次經驗令他學識慎言，以免再被人誤會，「我冇諗過，冇剪晒成件事，淨係抽一句個威力係咁大，以後會慎言，呢個係其中一個得着，其次係識咗一班好好嘅朋友仔。」追問他是否不止識了朋友，還識了女朋友，因有傳他跟另一參賽者丁悅撻着，「冇呀！今晚一齊坐係大會安排。（有人話見到你兩個行街？）吓！我冇睇過喎！謠言嚟，我哋好朋友啫！冇拍拖，唔會」
|
鍾意就快D Share啦！
|
|
|