熱爆娛樂: 31歲黃心穎未獲TVB解八年長約｜求放生轉做幕後出土《堅離地愛堅離地》成告別作 #TVB #堅離地 #堅離地愛堅離地 #黃心穎

2021年1月2日星期六

31歲黃心穎未獲TVB解八年長約｜求放生轉做幕後出土《堅離地愛堅離地》成告別作 #TVB #堅離地 #堅離地愛堅離地 #黃心穎

「安心事件」轉眼一年八個月，兩位主角亦各自努力生活，獲太太鄭秀文原諒的許志安，已開始錄新歌計劃今年復出樂壇。另一邊廂的黃心穎，同TVB最後一套倉底劇《堅離地愛堅離地》亦重見天日，但劇集播出，卻傳出她遭TVB解約放棄！不過傳聞歸傳聞，據知今次是黃心穎主動提出解約要求，同TVB尚有八年合約的她，自前年年底美國返港後，TVB都未有再與她接觸，現時只以冇薪假履行合約。被八年長約綁死舉步維艱，年半冇工作靠積蓄生活的黃心穎，亦醒悟不再留戀幕前等運到，主動求TVB放生，計劃轉戰幕後。不過，想重新出發，都要睇吓方丈肯唔肯開恩放行！

同無綫拍下的最後一套倉底劇《堅離地愛堅離地》近日播出，劇中黃心穎為賺錢無所不用其極，不但Cosplay扮女僕，又做KOL賺錢，不過角色姣爆唔多討好，相信都未必可以幫黃心穎加分。

修讀導演課程

向來獨大的TVB，近期被ViuTV追擊搞到陣腳大亂，播劇安排朝令夕改，倉底劇《堅離地愛堅離地》執到好籌得以趕在新年前重見天日。不過為「安心事件」找數入雪櫃的黃心穎，在劇集出街前，就傳出被無綫解約的消息，較啱時間幫劇集宣傳。

傳言滿天飛，但據知黃心穎至今未接到TVB解約通知，年多以來公司高層亦未有再跟她接觸，同無綫尚有八年合約被綁的她，現時只以冇薪假履行合約。據知情者透露：「可能真係整定，本來心穎同無綫只剩年幾約，但『安心事件』發生嗰年，佢啱啱同無綫加簽咗八年合約，嗰時TVB花旦走晒，公司講明捧佢上位，佢都知搞出禍自食其果冇得怨人！不過，嗰時高層安撫佢，話公司唔會放棄佢，心穎亦信以為真。但係，年幾以嚟公司對佢不聞不問，佢都知喺TVB已經冇得翻身，依家佢最想係公司可以放生佢，等佢可以重新出發，之前佢修讀導演課程，佢都想喺呢方面發展。」



有傳遭無綫解約冇得留低，《堅離地愛堅離地》的新海報黃心穎已經冇影。



日前《堅離地愛堅離地》舉行記者會，監製吳冠宇表示未有刪減黃心穎戲份，但就不欲多言，揚言要低調處理。



19年出事前，黃心穎和無綫加簽八年合約，之後「安心事件」令她事業插，被長約綁住。

廣告客搵上門

被八年約綁住的黃心穎，未來命運由TVB主宰，就算想出關亦要先過TVB一關，前年從美國返港，兩部倉底劇《牛下女高音》、《丫鬟大聯盟》先後「解禁」出土，據知當時亦曾有廣告客想食住話題，搵心穎演出，不過無綫經理人部門，主動提議客戶換人，令黃心穎復出無望。據知情者透露：「有啲客就係貪有話題性，所以一路以來，陸陸續續都有人搵心穎出嚟，雖然價錢唔算好高，但始終係一個出嚟見人嘅機會，不過無綫經理人部門唔放人，佢想做都冇得做！」



已經一年八個月冇工開，相信近期陪得黃心穎最多的便是三家姐黃心慧個B女，黃心穎不時晒出抱住姨甥女玩樂相片，表現開心笑到見牙唔見眼。

高層阻止開記者會

以往每次旗下藝人出事，TVB總愛借自己節目幫藝人洗白，不過無綫處理黃心穎事件就另一種態度。原來當日東窗事發，許志安極速開記者會認錯，當時黃心穎亦想第一時間出來交代和認錯，不過就被無綫高層阻止，才導致今日冇彎轉地步。據心穎身邊人透露：「件事爆出嚟嗰日，心穎雖然好驚，但知道犯咗大錯亦唔可以逃避，身邊朋友都幫佢搵緊地方開記者會。不過，無綫高層撳住佢，叫佢留喺屋企唔好出街，一切等公司處理同安排，點知件事愈鬧愈大，心穎被鬧爆冇誠意改過，就算去到依家，都仲俾人抨擊欠公眾一個交代，的確好無奈！」

一子錯，滿盤皆落索，現時愛情、事業雙失的黃心穎，兩年來經歷如同坐過山車，兩者皆由高峰直插谷底，經歷三十一年來人生最大的挫折，亦令她有很多領悟和改變，據知她亦有計劃想在網上平台開頻道，披露兩年來反省及心路歷程的轉變，用另一方式向外懺悔！本刊致電黃心穎，問她是否想和無綫解約及轉向幕後發展？她就表示現階段不作回應，只留下一句：「有Update會同大家講！」便匆匆掛線！