獲TVB最佳男配角
獲TVB最佳男配角
1988年，黃德斌入讀TVB藝訓班繼而入行，身形健碩的他，入行前做過不同工種，因為參加模特兒比賽而被薦入藝訓班。TVB兩次出入，入行33年，他嘗盡高低起跌。
黃德斌早年在TVB演的角色離不開路人甲乙丙，直至97年，他憑長命劇《真情》「越南」一角彈出，奈何發展不似預期。直至04年，在《金枝慾孽》飾演太監小祿子，被讚演技有突破，不過曇花一現。兩年後，他終於備受賞識，憑大製作《火舞黃沙》奪當年「最佳男配角」。
然而此後，黃德斌未有更上一層樓，依舊徘徊男二男三，甚至偶爾被派客串劇集。9年後，他才再有機會，連高層都不甚睇好的《刀下留人》升做男一，跟好戲邵美琪飾演一對，劇集在15年推出，不單收視好更贏口碑，但也不過維持了一段時間。到他17年離開TVB，最後一部劇集《婚姻合伙人》，又再跌回「男三」位置。
《真情》越南彈起
《真情》越南彈起
回想當日際遇，黃德斌不是沒有自我檢討。「好多人認識我都係因為《真情》入面嘅「越南」，所以好長時間都會叫我做「越南」，即係叫我戲裡面個名。因為越南呢個角色，我做咗好多訪問，當日以為會有更好發展，所謂嘅上位，點知又係無，都係繼續等。到《金枝慾孽》嘅小祿子，先至有番啲比較重要嘅角色，到《火舞黃沙》嘅宋東陽，之後又係無機會，所以嗰段時間維持咗好長。尤其是其他人話你開始掂，我覺得有幾掂呢？其實都係一樣，又要等另一個好角色，演員就係咁被動。」他曾撫心自問，為何情況又再出現：「而家回想番，可能仲有好多不足之處。但當日唔知應該要點樣做，例如其他人肯做嘅事，自己肯唔肯做？呢啲就係因素，因為演員係被動嘅。」
- 在ViuTV新劇《太平紋身店》，他飾演退隱江湖的大佬。
- 他笑言劇中沒有機會被周秀娜紋身，但飾紋身師的周秀娜卻有裸背性感場面。
- 《真情》飾演越南，他說當時有觀眾以為他是越南人。
- 跟姜濤合作後，他大讚對方勤力專注力強。
姜濤並非「懵吓懵吓」
姜濤並非「懵吓懵吓」
17年，黃德斌決定離開工作了29年的地方往外闖，第一部電影《逆流大叔》已獲提名，到ViuTv《太平紋身店》，更打正旗號「賣」的是有型有演技的黃德斌。海報中的黃德斌，白髮有型，網民甚至認為跟多年前發哥主演的《和平飯店》故事相近，都是說有經歷的人，找一個安靜地方生活。
「我都係第一次聽。我有睇過《和平飯店》，但完全無呢個想像，拍嘅時候無諗過，如果而家有啲人咁樣諗，我覺得又OK喎，發哥喺《和平飯店》嘅造型都好有型㗎喎。」他說。
對於跟新人姜濤合作，黃德斌說別以為他「懵吓懵吓」，埋位時已經可以準確發揮囝囝角色，他大讚姜濤勤力專注力強。懂得欣賞的黃德斌，何嘗不是另一個例子，當日奪得「最佳男配角」後，他也沒有大鑼大鼓炫耀如何努力不懈。
- 離開TVB，他拍了電影《逆流大叔》，更被提名金像獎最佳男配角。
- 周潤發多年前孭飛電影《和平飯店》，網民指《太平紋身店》的故事跟前者相似。
- 黃德斌坦言今次跟一班新人合作愉快。
- 黃德斌在TVB拍了多部電視劇，大都是COOL爆角色。
撒哈拉拍真人騷最危險
撒哈拉拍真人騷最危險
就像05年，他們一班演員留在沙塵滾滾的陝北黃土高原拍《火舞黃沙》，拍檔林保怡在拍攝中途以遮保命，同樣面對過小龍捲的黃德斌，也不得不承認在沙漠工作十分艱苦，他之後到過另一個沙漠開工：「我曾經去過約旦嘅月谷沙漠，情況仲厲害，當地人點解會叫月谷，就係因為好似月球表面，好多窿，好多石。我哋拍攝期間，突然間見到遠處，直情好似電影場景，所有嘢都見唔到，只係見到啲沙慢慢吹過嚟。我唯有即刻跑去嗰啲窿匿埋，見到外邊風沙不停吹。過咗十幾分鐘之後先開始清晒，然後又可以出番去開工，喺沙漠就會有呢啲景象。」他說13年去撒哈拉拍真人騷《極地狂奔》，才是最危險的一次。
「嗰一年好緊張，因為我去之前一年，有四個人失蹤咗，就係因為突然出現沙塵暴，到而家都未搵得番。但咁多屆以嚟都無事，只係我去嗰屆嘅前一年，突然出現沙塵暴，然後有四個人失蹤。」黃德斌說來輕描淡寫，但當年他也是在抵埗後才知道出了意外。
「但喺撒哈沙每一日都有不同境況，每一日嘅沙漠好似一樣，但其實風景都唔同，我覺得都值得去。」提到沙漠風景壯觀，令一直COOL爆的黃德斌手舞足蹈起來。
專一暖男
專一暖男 是的，自從18年宣布跟細16歲的圈外女友Joyce結婚，黃德斌的專一被視為圈中難得「暖男」，他回應：「關唔關事呢？會唔會係你哋諗得多咗呢？你哋喺熒幕上見到我，到同我面對面傾偈時感覺又唔同咗，會唔會係咁樣？」
不過，黃德斌說會改變：「因為我面口起晒角，我自己都知道，所以可能笑番多啲會比較好。」是暖男的回應嗎？ ![跟老婆鮮有合照，在她身旁，黃德斌笑得特別開懷。]()
- 跟老婆鮮有合照，在她身旁，黃德斌笑得特別開懷。
![當日訪問講到在沙漠工作的情況，黃德斌表達時手指指，十分興奮。]()
- 當日訪問講到在沙漠工作的情況，黃德斌表達時手指指，十分興奮。
![用手勢形容沙塵暴殺埋身。]()
- 用手勢形容沙塵暴殺埋身。
![他要慌忙避入石窿。]()
- 他要慌忙避入石窿。
![黃德斌不笑被指太COOL，他說以後可以笑多啲。]()
- 黃德斌不笑被指太COOL，他說以後可以笑多啲。
----------------------------
立即加入壹週刊MeWe
-----------------------------
《香港百年超級豪宅揭秘》經已出版 各大報攤及便利店有售
可按此網上訂購
----------------------------
守住新聞自由 和你撐壹週刊計劃 每月港幣$300起
按此了解更多
- 跟老婆鮮有合照，在她身旁，黃德斌笑得特別開懷。
- 當日訪問講到在沙漠工作的情況，黃德斌表達時手指指，十分興奮。
- 用手勢形容沙塵暴殺埋身。
- 他要慌忙避入石窿。
- 黃德斌不笑被指太COOL，他說以後可以笑多啲。
來源 source: http://nextplus.nextmedia.com
|
鍾意就快D Share啦！
|
|
|
