2002年港姐季軍胡家惠(Cathy)本來是幸福濶太，2016年陀住第二胎時發現上市公司前夫有外遇，經歷離婚、自殺、患上鬱燥症後，2018年帶住兩個女兒重新出發，尋找人生價值，做義工及愛心湯包捐贈獨居長者，去年又在中環開設美容院。不過，美容院生意一開就遇上難關，今年三月她接受蘋果日報訪問，對疫下生意受影響處之泰然，「最緊要留返條命，留返條命就咩都做到!」。事隔九個月，美容院仍要封閉，她無心插柳的愛心湯包《靚湯Souper》生意，卻逆市突圍，生意額急升十倍，今個月更擴充搬office、請人兼出新產品，2020年瘋狂又困難的一年，上天卻為她打開另一度大門。
【美容院停業 人工照出 】
胡家惠坐在剛搬的二千幾呎寫字樓受訪，窗外可見獅子山風景，她開心介紹新辨公室。「講你都唔信，其實兩個星期前 ，我哋office係得三百呎咋，坐五個同事，人人背貼住啲貨同紙箱坐，好迫嘅，𠵱家大咗六、七倍，仲有齊廚房、十人枱、自己嘅貨倉，真係好開心。」裝修時決定加入廚房、可換不同風格的布幕，方便下月開始拍片開Channel。胡家惠原定全心全力做的美容生意，因疫情繼續停擺，「 我嘅美容院開咗一年，直情好似冇開過業咁滯，2019年九月開，跟住社會運動，疫情一月開始，我地三月停咗一次業喇，七、八月又停咗兩個月，𠵱家又再停過。好慘! 租金太貴冇得減，同埋我哋係照出糧畀員工，政府有補貼但幫唔到幾多。」
【日做16小時 疫下擴充 】
疫情搞足一年，她的即食湯包生意因禍得福，營業額和去年對比勁升十倍，「 嗰時唔係正式做，主要係做嚟捐贈用，一個月捐一兩百包咁，後來越捐越多，𠵱家累積捐咗六千幾包俾獨居長者。但靠捐，係唔可以維持個生計，所以真係要做生意，就變咗當一個business咁持續去run。」 胡家惠甚有商業頭腦，自家湯包品牌亦發展得快，短短幾個月已擴充，更計劃出即食健康餸、賀年花膠菜式等，「秘訣？都要勤力囉，我一日做十六個鐘頭㗎，同埋要做好個branding。疫情下啲人唔敢出街，所以都幫咗我哋幾多，我哋已經上咗架，在網上有得賣，在線下嘅超市都有，因為要快、要方便，性價比高，同埋我係媽咪有兩個女，食嘅嘢要健康。」她離婚重新振作後，領悟到一個女人不應該只為男人而活，要有自我價值，亦勉勵同路人要爭氣。她曾和前夫一齊打拼，成功將生意上市，湯包生意目標也是上市？「邊有咁快呀？冇去諗上市，𠲖家只希望多啲人認識，同埋希望做到有民生接觸到嘅地方，都買得到。」
【女兒全年返30日學 】
2020年全球疫情，一對女兒、6歲大女Charlotte和３歲幾細女Christy，長期在家上堂，她統計過，大女全年只返了三十幾天學，細女亦只上了四十幾天，她有時見到細女連續坐定兩小時上zoom課程，都為她們心痛。幸好兩個女兒和她一樣，性格開朗，活潑，拍攝期間不停跳BLACKPINK及BTS MV的舞，打筋斗、又唱又跳，充滿表演慾。「大女話要做K pop明星，好瘋狂！有時我放工返屋企呢，佢要我停響門口度，佢同阿妹已經排好咗成隻舞俾我睇，好利害，我都睇到呆一呆。」港姐出身的她，不介意女兒做童星， 「冇乜所謂，自由發展啦，最緊要唔好影響到健康、學業，咁就ok 俾佢試吓囉。佢哋都知媽媽辛苦，一個人做兩棲三棲係好難，又有自己公司，又要拍嘢，又要理屋企，佢哋都知媽咪辛苦，咁等佢哋感受吓都好。」
採訪：林妙萍 攝影：林德雄、周樂恒
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|