今期想寫一下陳百強（Danny），他離開我們已經27年了。1993年他因昏迷引發的逐漸性腦衰竭死亡，終年36歲，多麼的英年。從1985年認識Danny，當時他已經是樂壇一位當紅偶像歌手，知道他聲線好獨特，音樂好有才華，一身充滿優雅氣派，衣着有品味，留下無數經典作品，直到現在仍然有人聽着他的歌，他是80年代獨一無二的歌星。
第一次見他是在一個電台搞的記者會，好多歌星出席，張國榮也在場，當時圍住Danny的記者比哥哥多，但其實哥哥84年憑一曲《Monica》走紅，風頭好勁，幾乎與Danny平起平坐。不過論訪問對象，我會比較喜歡跟哥哥訪問，因Danny很情緒化，在訪問途中我見過他突然會很忟憎，揼腳撒嬌，然後說：「今日心情唔好，唔想傾」不過他是受氹的，美言他幾句，等他心情轉好，他又會繼續聊下去。
其實80年代娛樂圈不少舉足輕重人物都愛護他，我曾經聽周潤發說過：「Danny是一位弱小心靈的小朋友，是受保護動物，希望大家愛他。」但性格影響命運，Danny很容易鑽牛角尖，經常會情緒好低落，身邊不少朋友勸過他，但他總是聽不入耳。88年我曾經有次在麗晶酒店約了哥哥下午茶，剛巧遇到Danny約了一些朋友茶敍，他見到哥哥時是很熱情走過來坐下，聊了一會兒才離開，兩個人是很開心在聊，完全不像外傳般不和。
等Danny離開後，我曾經問過哥哥：「你同Danny唔係不和咩！」他說：「以前係有啲芥蒂，都過咗咁耐，冇嘢」我問：「係咪因為以前佢紅過你，後來你爬咗佢頭，所以佢唔開心呀！」哥哥表示：「當時我仲喺麗的電視做路人甲嗰時，佢成日接我放工，嗰時好好朋友，但後來同佢拍完《喝采》，外間反應覺得我表現比佢好，後來有人再想搵我同佢一齊拍《失業生》，我聽到佢唔想同我做，但導演堅持要用我，佢就好唔情願接咗，嗰時我係會唔開心，對佢有啲避忌。」
後來Danny與哥哥各有各發展，Danny的成績已慢慢受到哥哥威脅，哥哥表示：「我而家對佢已經冇嘢，大家係可以真心坐低傾偈。其實Danny份人好好，又唔諸事八卦講人是非，唔會傷害人，亦唔虛偽，又唔鍾意埋堆。圈中錫佢嘅人多過我，而且佢喺娛樂圈條路走得順我好多，比我紅得早。不過佢個人多愁善感，成日唔開心，我都有開解佢，但佢唔聽人講，我都冇辦法。」張國榮在club認識陳百強，所以張國榮坐開篷跑車第一首播的歌是陳百強《深愛着你》。
記得有位80年代在Danny經理人陳家瑛（Katie）公司任職的女助理A小姐告訴我，她說有段時間經常會接觸到Danny，雖然不是他的Fans，但對他印象很好，她說：「嗰時工作需要，經常見到佢，雖然佢好似少爺仔，但佢對人冇乜架子，有次出埠，我想幫佢攞行李，點知佢第一時間搶番話：『我攞得你係女仔，件行李咁重，等我拎』自嗰次之後，我真係覺得佢個人好好，雖然佢好情緒化，成日會覺得寂寞同唔開心，但同佢做嘢咁耐，我冇見過佢發脾氣鬧員工。」
A小姐表示：「佢喜歡落去DD跳吓舞，飲酒放鬆吓，Katie怕佢有時會飲多咗，所以多數要我哋玩完就送佢返屋企。有次我一個人送佢返屋企，落車時佢將手上價值幾萬美金嘅手錶除落嚟話送畀我，明知佢飲醉，我梗係畀番佢，點知佢死都要畀我，咁第日我攞隻錶返公司，咁啱Danny又喺公司，我就當住Katie面話畀番佢，但Danny話：『我係真心送畀你，因為成日煩到你，我唔會收返，你收』咁Katie同意下，我先敢要，不過隻錶我一直保存到而家，從未戴過，後來聽到佢過身，真係好傷心。」
Danny生前確是好喜歡去中環的「Disco Disco」，我以前在這店也撞過他幾次，有次他要求DD的DJ幫他播《眼淚為你流》，但DJ拒絕了，指歌曲太抒情，他不斷爭取，最後DJ說：「再夜啲！等冇乜人先幫你播」因此他就整個晚上不開心，總是見到他在幽暗的角落捧着酒杯，一個人面對鏡子跳舞，一臉憂鬱，每次都是帶醉離開。我問過一位經常陪Danny流連DD的好友，到底他為何經常不開心？好友說：「主要係事業、愛情同家事囉！好似佢以前係紅過張國榮，但後來俾人追過，佢會意難平，不過佢又唔係憎Leslie喎！係嬲自己唔爭氣，佢個人好和平，好少會恨人。至於感情，唔知點解佢成日失戀，俾人飛嘅！家事就更複雜，佢個人追求完美，小小事唔順心都會影響佢情緒。Danny有首歌《一生何求》，當中有幾句歌詞：『一生何求，迷惘裏永遠看不透，沒料到，我所失的，竟已是我的所有』，我成日同佢講，簡直係你人生寫照，佢係認同！」
哥哥抑鬱症去世後，我才想起Danny的症狀，其實他當時好大可能是患上此症，但當年「抑鬱症」這個詞語在社會上並不普遍，無人給他援手，無人給他專業的指導和治療。從83年起，Danny就已經在尋求心理上的幫助，因為一直無法控制沮喪情緒，想嘗試學習快樂做人，但可惜他總是在開心時聯想起不開心的事，當時他都懷疑自己是否患上心理病。
Danny生長於一個富裕之家，兄長和家姐都是大媽所出，其母只生下他一個兒子，後來離開了陳家。直到Danny離世前4、5年，媽媽才回來跟他住在一起。但對Danny來說，與經理人陳家瑛的感情好得更像母子，還有一手帶大他的契媽蘇太。與父母關係疏離，所以他選擇獨居。陳媽媽是愛他的，但不知怎樣去愛，有時她會偷偷跟去Danny工作地方，想了解更多兒子的情況，但Danny不喜歡媽咪來他工作的地方，有次約了Danny在某地方訪問，突然見到陳媽媽在門口，問她為何不進來？她說：「我嚟睇下咋！千祈唔好畀Danny知道，佢唔鍾意，我嚟睇下佢，好快走。」其實Danny是知道他媽偷偷跟過來，只是裝作不知道，明知媽咪想多見他幾面就隨她吧！
梅艷芳、何超瓊和林燕妮是Danny圈中最好的朋友，Danny去世後，有次去片場探阿梅班，她正坐在車上聽Danny歌曲《今宵多珍重》，我說：「你仲好掛住佢呀！」阿梅點點頭說：「我同Danny好投緣，但我發現佢成日唔開心，佢有同我訴苦，所以我知佢情緒低落時會主動打畀佢，想開解佢，叫佢唔好咁睇唔開，有乜事就同我講，唔好擺埋喺心，雖然我成日勸佢，但我發現冇乜用，佢都係聽唔入耳。」
----------
作者介紹：白露眉，縱橫娛樂圈35年的資深記者，看盡圈中人情冷暖；這年頭，地球病了，娛樂圈轉慢了，白露眉是時候出手了，在《蘋果》分享【非常人•非常事】，跟「蘋民」圍爐取暖。這次會一周寫兩期，每逢周三和周日刊登，不過周日不會開名寫人物，我會以秘聞方式寫娛樂圈的有趣事。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|