商業電台一名清潔員工初步確診武漢肺炎，該台今日透過外事部表示該清潔員工最後上班日子是本月16日。商台已即時安排清潔公司在廣播道的商台大樓，進行全面徹底消毒。商台在公告中話「本台所有員工及訪客進入本台均必須配帶口罩及接受體溫測試。如員工發現不適、發燒或出現其他徵狀，必須即時求診及向管理層匯報。」
商台DJ少爺占對有員工確診直言擔心，他接受《蘋果》訪問時，以短訊回覆表示：「一定會擔心啦，但係都冇得過分擔心，因為今時今日總有一個喺你附近……照我記憶呢一個月我都冇同佢接觸過，加上我已經五日冇響公司出現，應該安全。其實最擔心嘅係嗰位中招同事嘅健康，識咗廿幾年，一家人咁。希望個位同事快啲冇事啦，因為佢都年紀大。」DJ雲妮話是從記者口中才知道有員工確診，她說：「都冇得擔心，返工坐車都會接觸好多唔同人，自己就一向小心，成日都用酒精搓手，門柄都成日抹。啱啱先知道個同事，平時有同佢講早晨，但冇講過嘢，都冇試過一齊撘電梯或者共處。」
森美則表示商台防疫措施做足，所有DJ做節目時都會戴口罩，加上中間會有膠板阻隔同每次轉咪都消毒，應該問題不大。他指自己跟出事的女工沒有接觸，他說︰「而且見到其他女工工作時都有戴晒口罩，做清潔尤其注重衞生，應該都唔太擔心。同其他同事都冇長時間逗留、傾偈開會，過去一個禮拜自己都冇。做完節目就離開，返屋企就洗手，應該都OK嘅。今日有工作，上禮拜五都做完深喉唾液快速測試，結果陰性。本身都有快速測試（劑），有同事擔心，有需要可以幫佢哋做，互相幫忙。公司知道消息之後，我做完節目都開始做消毒。」
另外，每日在商台開咪的盧覓雪就話無得驚，她說︰「冇乜好擔心，新冠肺炎肆虐一年，當南極洲喺舊年12月都出現確診個案，意味住整個地球都已經失守。全球確診數字接近一億，死亡人數超過200萬，我冇諗過我工作及居住環境周圍沒有人被感染囉。我同個清潔女工嘅接觸唔多，都只係見面打招呼叫聲早晨，如果係《晴朗》團隊，我嘅拍檔林海峰、阮子健確診，就會驚啲，始終喺直播室同佢哋日日對足兩個鐘，好彩，商台指引好足，做節目一定要戴口罩，否則炒魷魚。個人認為做足個人基本衞生防護措施，基本上足夠。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|