曾志偉和王祖藍回巢TVB救亡，不過雙雙由幕前轉任幕後，其中曾志偉擔任TVB副總經理兼行政委員會特別顧問，王祖藍則擔任首席創意官，二人主力統籌綜藝節目內容。
汪明荃曾在台慶節目上表示希望TVB加人工，又少啲山頭文化，方可挽留人才。今日她在電視城為節目錄影，明言志偉回巢，將會有自己山頭：「多啲嘢就好，良性競爭。」但她又指不希望集中在一、兩個山頭：「每個地方都有山頭文化，每一個團隊都想得心應手、合拍，咁大間電視台我都希望百花齊放。」
掌管綜藝科節目的高層余詠珊與志偉有「牙齒印」，志偉曾寸爆余詠珊改革港姐賽制，由直播變錄影，在余詠珊掌權下，志偉近年極少為大台做大騷主持。今日余詠珊受訪講到志偉回歸，她表示已約好志偉在農曆新年前傾今年節目計劃。
銳意在綜藝上博一鋪，余詠珊指有問過志偉會否再做獎門人，她說：「行香港？大灣區？周年紀念？黃金組合？等佢返嚟先傾。」汪明荃形容去年大台綜藝節目單一，飲食節目多，余詠珊突然訴苦：「舊年好多問題，出街拍嘢都成問題，我哋都唔想（冇其他綜藝），但只可以匿埋做。要諗點樣有節目出街，但又安全，逼住做好多飲食節目。」她又透露原本打算寧願隔離，都要安排人手出外拍旅遊節目，但因為疫情反覆要暫停。
現時大台有一個長做長有的綜藝節目——《流行經典》，余詠珊表示：「想停都好難。」她指節目可以提供機會給歌手唱歌，對出碟宣傳有幫助：「本來有段時間想停，但知道停會影響到好多人生計，節目令一班曾經好紅或者長青歌手，喺佢哋搵錢生涯上有好多援助。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
