（新增回應）
富三代鍾培生因不滿林作抽水，在社交平台下戰書，並提取100萬現金要跟林作打擂台隻揪，豪言：「輸贏都畀你。」《蘋果》今日聯絡上鍾培生，他餘怒未消說：「我唔同佢講廢話，呢個人我完全唔識，加上我唔會同呢個人個名擺埋一齊，如果擺埋一齊，就上擂台，因為擂台人人平等，無論你身份係點，有錢冇錢，讀唔讀書，擂台最fair。」
有指鍾培生曾參加業餘拳擊賽，跟林作對打是否有欠公道？他說：「其實我打咗兩、三年，我都係打業餘慈善賽，如果佢要同我打冇問題。佢一開始係抽我水，我唔識佢都抽我水，咪擂台見囉，你贏100萬，輸30萬，之後我都即刻話OK畀多70萬你囉，你簽合約就OK，簽生死狀，隨時開得波。」
對於林作疑縮沙，鍾培生再加辣招：「我畀200萬港紙畀你，你畀我打一鑊。」鍾培生帶點不屑說：「佢之後又乜又物，懶落阿媽度，懶落姨媽姑姐度，又話唔Q打，咁就話攞番200萬出嚟？第一，佢有鬼200萬咩；第二我當你真係有，冇問題，我都預你縮沙，我咪同你傾囉，第一個回合我唔還拖任你打，第二個回合先『𡁻』你囉，你要戴頭盔咪頭盔，安全嘢可以傾。」鍾培生直言不想繼續我一言、你一語：「我唔鍾意講廢話，都係嗰句『No bullshit let’s go』，我都唔鍾意講咁多嘢，係就打。簽咗畀cheque又得，現金又得，總之簽合約。」
鍾培生認為即使花費100萬也是值得，他說：「全香港人最開心嘅事我為香港人爭光香港人最想睇嘅嘢就係我揼佢，近年有邊次咁團結，我啲message、IG咩媒體都爆晒，大家都話好想睇。」如成事會否開直播？他說：「佢肯打先講，佢肯打就咩都有得傾。」
林作傍晚時分再在Facebook留言：「我出100萬現金過佢同我做場辯論佢又會唔會夠膽應約？攞自己主場對我，我都未拒絕。研究中，算係咁啦？」
及後鍾培生透過公關公司發聲明如下：
本人鍾培生昨日 2 月 18 日發現林作於本人被 訪問報道下留言，意圖借本人送出禮物與林作籌錢金額之巧合，吸引大家眼球並博取宣傳。有見及此，本人即時邀請林作上擂台，及提出如果林作勝出，本人將給予100萬港幣予林作，倘若林作輸掉比賽，本人亦會給予30萬港幣予林作。
其後林作先後於其社交媒體稱自己並未怕過，及發文指如果籌到70萬便與本人「死過」。本人不忍大眾因為此事而向林作付出金錢，因此決定不論勝負，林作只要簽下合約上擂台一戰，即給予100萬港幣，並即晚聯絡銀行提取100萬港幣現金。
惟直到2月19 日清晨，林作發文指給予本人200 萬，並讓他「打一鑊」，對早前指籌到70萬便與本人「死過」之事隻字不提，令本人對林作的誠信極度質疑。百萬現金、場地及合約已備，本人承諾首回合亦不會還手，保險業向來以誠信為本，本人諭作為保險從業員的林作可以言而有信，上擂台一戰。No bullshit. Let’s go.
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
