2021年3月8日星期一

小學雞記者會後網民轉軚打氣林作貼訓練相讚自己態度認真 #林作

小學雞記者會後網民轉軚打氣林作貼訓練相讚自己態度認真

林作今日透露已開始為上擂台進行特訓，有不少網民為他打氣。

林作早前在社交網以一句「抄我100萬？」辣着「百億富三代」鍾培生，後者豪擲100萬邀林作上擂台對打，雙方隔空罵戰擾攘半個月，終於落實在今年9月開打。作為拳擊新手的林作最近積極備戰，今日他在IG透露已開始接受訓練，又分享練拳照片。

相中，身穿黑背心的林作，操到大汗叠細汗，他留言：「第一堂，刻苦訓練中。你可能以為林作係傻嘅。但鏡頭下嘅林作，做嘢態度之認真，可能會嚇死你。如果唔係，我唔會入到哈羅、讀到牛津、做到大律師、保險爆數、團隊爆人等。」繼上星期五林作與鍾培生舉行「林鍾一戰」的小學雞記者會後，有不少網民指林作口才了得，網上風向紛紛由原本支持鍾培生轉軚為支持林作，今日亦有不少林作的支持者留言：「原本唔支持你，而家希望你加油！」、「型仔，加油！」、「加油！看完那個發布會，我支持你！」