世界大亂，比特幣（Bitcoin）被炒起，連帶一眾買賣加密貨幣的平台亦人氣急升。當中最大型的中心化加密貨幣交易所幣安（Binance）就是其中一個。惟在「幣安」火速冒起之時，就有不法之徒食正潮流，透過交友程式搵水魚，鎖定目標後就力銷對方於「幣安」開戶並買入與美元掛鉤的加密貨幣泰達幣（USDT），再要求對方把錢轉入假的「芝加哥交易所」賭博網，設下真假網站交替用、令騙徒身份更難追蹤的騙局。
「如果留言話我蠢我都預咗嘅，但當我知道唔係得我一個有咁嘅遭遇後，我就更加想透過自己嘅個案警惕其他人。」玩了交友程式Coffee Meets Bagel不夠一個月的25歲黃小姐，就是受害人之一。
她除了被騙去辛苦儲下的積蓄16萬元，更在騙徒慫恿下向五間不同的財務公司合共借貸15萬元。如今人財兩失，但幸得家人出手先幫忙還清借貸，才令黃小姐更有勇氣向大眾道出經歷，「一開始係叫我用幣安過錢，但期後已經係直接叫我入錢落佢哋提供嘅銀行戶口，其實有齊戶口同戶口名，講真警方係可以做嘢㗎。」縱然手法猖獗，黃小姐亦發現有其他受害者也是入錢落同一批銀行戶口，但報案後卻一直未見警方有進步行動。
以「幣安」入錢獲取信任
以「幣安」入錢獲取信任
任職瑜伽健身教練的黃小姐說話溫柔有禮，因經常運動身型十分平均，看落甚為高挑，外表跟一般90後也無異。單身了一年多的她，在朋友介紹下開始玩交友程式Coffee Meets Bagel，「玩CMB前有玩過tinder，但下載了兩三日就del咗，人哋話CMB較正經，所以我想試試，識多啲唔同範疇嘅人。」玩了短短數日，就結識了自稱來至台灣現居香港，從事IT行業現時做老闆的騙徒「陳志彬」。騙徒埋身手段其實萬變不離其宗，就是噓寒問暖及投其所好。「其實一共只傾咗四日，但對方畀我感覺好投契，每日講早晚安係一定有，基本上係秒覆，我鍾意行山佢又會主動同我講行山嘅嘢，甚至會話約日一齊行，令我真係覺得佢人喺香港。」相貌端正，笑容陽光又自稱自己有米八高的「陳志彬」，不時向黃小姐發送自拍及各種生活照，又會錄音調情稱呼她為「老婆」。十分進取的「陳志彬」更要求黃小姐跟他確認情侶關係，更找來移民台灣的須知，盛意拳拳表示希望跟對方共建未來。但凡黃小姐稍稍卻步或要求先見面，他就表現得傷心欲絕認為自己被質疑，又用苦肉計指十分失望要回台灣去。
「當我發覺對方條件咁完美，同我心目中嘅人選一模一樣時，我就好想佢留底。」不虞有詐的黃小姐不敵對方的攻擊，最終確認了關係。在得勢後，「陳志彬」開始入正題，指自己因疲情收入受影響，現時主要靠破解類似買六合彩的博彩網站維生，誠邀黃小姐加入。「件事係由一個真嘅交易APP同佢哋一個假嘅網站，真假交替而成嘅一件事，所以頭幾次交易係透過一個真嘅交易平台去做。」那個真的平台，就是現時大熱的「幣安」。
身為全球最大加密貨幣交易所的「幣安」由加拿大籍華人趙長鵬於2017年創辦，現時可以買賣過百種加密貨幣，受世界各地人歡迎。「頭幾次都係向呢個平台買美金（與美元掛鉤的加密貨幣泰達幣USDT），然後再聯絡假網站客服稱要增值。除咗入錢，我都曾經喺幣安提過錢出嚟。」按騙徒要求提供「幣安」錢包QR code及link的黃小姐，眼見資金在「幣安」內有入有出，因而對這個「芝加哥交易所」網站深信不疑，而且在客服提議下，開始直接過數予他們所提供的銀行戶口。「戶口分別有一個中銀，一個花旗，三個南洋，全部都係人名唔係公司。」存錢後再由「陳志彬」的帶領下，跟買類似六合彩的「大細」及「單雙」等不同號碼，以中獎賺錢。
稱情人節要聯名入夠80萬港幣 否則本金將被凍
稱情人節要聯名入夠80萬港幣 否則本金將被凍
「當時臨近情人節，班客服話有個情人節增值活動，滿幾多錢就會送我幾多錢，係美金嚟嘅，咁我無諗太多又無問清楚遊戲規則就應承咗。」該個活動要求黃小姐及「陳志彬」二人聯名參加，共同在限時內先入約80萬港幣的本金至網站內增值，如在限時內無法完成，帳戶將會被凍結。基於活動是聯名進行，黃小姐在不想連累對方的心態下就把九成積蓄，約16萬元入戶。「騙徒話佢帳戶內有20萬美金，我就得幾萬（美金），當時我係唔想連累對方戶口被凍所以設法入錢。而對方更加話自己會去貸款，都叫我去貸款一齊完成。」黃小姐分別在一線及二線財務公司，合共借了15萬元。「其中一間係邦民，佢最有人性只借我1萬蚊，接著其餘4間財仔都係二線，年利率係58％，計返每個月我總共要還6,000幾蚊。」身為瑜伽健身教練的黃小姐19歲開始工作，疫情前月入有2.5萬至2.8萬元，但疫情期間就手停口停零收入，積蓄更一次過被騙光。
「去到後期，對方話就快新年，資金周轉唔到就無再覆我。」未對質，騙徒已先消失，黃小姐本先更打算找家人幫忙完成活動，但發覺並不對勁，開始慢慢醒覺。黃小姐由查知下發現對方電話號碼是太空卡，至打去真的「芝加哥交易所」fact check得知一直使用的網站是假的，到在網民幫下查獲「陳志彬」照片源自內地一個男模特兒的微博，真相如洋蔥般被層層揭開，反而令黃小姐舒一口氣。
受害者不只一人 警方未見行動
受害者不只一人 警方未見行動
「當我知道自己真係被呃後，反而比較冷靜，未知件事係點前幾天就較焦慮。最重要係我家人肯幫手，如果家人唔肯幫手，我應該無咁樂觀。」事情來得快完得快，黃小姐對網民批評已「打了個底」，預了被冷嘲熱諷亦無所畏懼，只因她不欲再見到人受騙。「我再拜託朋友於唔同渠道發放消息，有位女仔同我講佢都一樣被呃了，她亦同樣去咗貸款，而且當中有三個騙徒嘅銀行戶口係同我一樣，佢最後喺我鼓勵下都去咗報警。」不過，報了警也未見得事情有進展，「警方話啲戶口好眼熟，特別係有其他受害者搵我，當我們轉帳戶口有三個相同，代表騙徒仍然係呃緊其他人，咁警方其實隨時都可以截停佢哋啩？」對取回金錢早打定輸數的黃小姐，寄語大家如遇同類事情，一定要及早找身邊人商量。「呢啲手段其實一直存在，但我仍然落疊。可能比較天真，完全相信對方講嘢，又無同身邊家人或朋友提及過。希望大家遇到呢類事時，嘗試同身邊的人傾，多幾個腦諗總好過一個腦去思考。」
專家：錢包切記開齊安全認證
專家：錢包切記開齊安全認證 雖然類似的騙案一直存在，但騙徒手法層出不同，今次更借了「幣安」過橋，很容易令人防不勝防。香港資訊科技商會私隱及網絡安全副主席范健文提醒，加密貨幣交易所用家切勿胡亂把錢包link及QR code給予陌生人，及切記開齊不同的安全認證，他指：「如果要轉錢其實好複雜，首先要我哋行內叫做wallet address，理論上要於APP內同意，要有sms code及email code，要有幾個部分嘅授權先可以將USDT從事主錢包轉到其他人錢包中。今次係因為事主相信壞人，所以壞人叫佢點做佢都照做。」
范健文表示用加密貨幣交易雖然是匿名化，但同樣可以追蹤。記者用事主所提供的騙局網充值link從以太坊Etherscan上查蹤，發現騙徒於1月17號至2月8日期間，就已向不同的人收取過相等如620萬港幣的巨額USDT，意指可能仍然有其他受害人入錢予騙徒，期間騙徒更在不同時間分別轉走戶口內的錢。然而，涉事帳號於2月8號後再無新交易，未知是否已經停用。范健文另外指出，騙徒所設計的假網其實有跡可尋，「瀏覽器為提高咗網站安全度會有提示，只要打開網站後見到瀏覽器左上角提醒係not secure，已經係一個好大嘅警告，要小心。」說到尾，無論是銀行過數或是使用加密貨幣平台交易時，核實對方身份及事情真偽，是最首要及關鍵的步驟。
撰文：黃綺敏
拍攝：石鎬鳴
----------------------------
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
來源 source: http://nextplus.nextmedia.com
|
鍾意就快D Share啦！
|
|
|
