第一次亦係最後一次，聽落好傷感。
歌手J.Arie（雷深如）喺剛播完嘅《陀槍師姐2021》大結局竟然有份，仲係做殺咗男朋友嘅殺人犯，佢喺社交平台上載同陳豪、宣萱合照，搞笑留言：「明明我只係出咗3秒，講咗3句對白『吓』、『哦』、『你都係扯吧啦』....點解你哋都會睇到，平時好日又見唔到我真大鑊，陳豪係我電視界絕對嘅男神，終於係第一次亦應該係最後一次同框，宣萱嚟講，真人真係好靚，感謝第一次亦係可能係唯一一次出現喺劇集。」
J.Arie解釋因為之前簽咗TVB和邵氏，先有機會拍劇，佢話：「不過我啱啱情人節就完咗約，所以覺得係唯一一次，亦都係最後一次，因為全年我做過嘅嘢就係講咗呢3句對白，都多謝舊公司畀我客串大結局。」佢又笑言本身喺另一套劇《飛凡三俠》都有一句對白，但佢都覺得好無謂，最終都畀人Cut埋，所以今次好難得有3句對白出街。
談到男神陳豪，佢笑言：「鍾意咗佢好耐，陳豪都應該知道，因為我都同佢講過幾次，仲透過唔同嘅人同佢講過，可以同到佢、宣萱同框出現係超難得。」
來源 source: http://hk.on.cc
|
鍾意就快D Share啦！
|
|
|
