直認曾抗拒鄭嘉穎 陳凱琳媽媽讚女婿101分
本周日適逢母親節，陳凱琳（Grace）母親陳劉慧嫻（Connie）應車淑梅邀請上電台節目任嘉賓。Connie將迎來一個更熱鬧的母親節，因為Grace的孖生弟弟為她娶了個新抱，Grace也為多添了一名孫兒。Connie透露子女們已預告，母親節或會為她親自下廚，又或與她外出用膳，笑言已準備任由他們擺佈，總之健康開心，日日都是母親節！
曾有人將香港小姐冠軍女兒Grace與龍鳳胎弟弟Derek的混血兒標致外貌與大女兒Joyce作比較，坊間亦流傳大女兒曾因妹妹較漂亮而感到自卑，Connie回應：「其實Grace同Derek龍鳳胎出世嗰陣同大家姐一樣非常白淨，但突然喺14、15歲嘅時候眼大咗、臉尖咗，阿仔鬚根多咗，可能我嘅媽媽係馬來西亞人，擁有亞裔嘅容貌，細佬又喜歡戶外活動，又或者加拿 大嘅食物有好多荷爾蒙」Connie續謂：「大家姐Joyce比較運動型、率性、唔計較，係
好柔和嘅人，相反Grace3、4歲開始已經唔著裙就唔肯出街，有一次去海洋公園，佢硬要著裙，否則佢寧願唔去，結果佢真係選擇留喺屋企。坦白講Joyce 14、15歲進入青春期，我真係問過佢『 如果有人話妹妹靚過你，你會唔會唔舒服？』Joyce直說唔會：『Grace係我妹妹，每個人都靚，只係角度唔同，其他人唔可以用容貌去分裂我哋，否則我會將話題停止。』」Connie又謂：「Grace好愛家庭，好愛家姐、崇拜家姐Joyce好有創意，屋企嘅聚會都係由佢安排，令到所有人都好開心。」
對Grace事業剛起步便受到鄭嘉穎熱烈追求，傳聞當時陳媽媽並不接受，Connie直認不諱：「係呀！一、我唔認識佢 （嘉穎）；二、聽聞佢好花弗；三、年紀都有少少影響，怕佢只係玩玩吓。但我唔可以一刀切，始終大家都係成年人，我初時唔想見佢，因為我驚唔知點面對佢同相處。我真係好驚，好唔開心，唔知點算好，因為呢次係Grace嘅初戀，Grace就提議大家分開祈禱，結果，祈禱中，上帝要我主動去認識佢。」Connie又坦言：「因為我重視婚姻，工作、交友等等可以轉變，但婚姻要好謹慎，唔可以『合則來不合則去』。記得第一次見面，佢（嘉穎）好熱情，好有禮貌，講嘢唔會左顧右盼，實話實說，係個誠實嘅好孩子，好值得我尊重，我哋大家以成年人嘅態度去溝通。我心入面係唔應該諗佢搶咗我個女，或者佢哋兩三年之後會散啦，更唔應該無奈地、死死氣地承認佢哋一齊，於是我繼續禱告，經過多次溝通，我哋先至互相接納，至可以融為一體。」
問及Grace與嘉穎拍拖三年便結婚是否太快？何謂Right Timing？Connie覺得大家成熟、覺得適合，便是Good Timing。「我聞訊大大祝福，非常祝福，送上從上帝而來嘅祝福！我呢個女婿好熱情，好尊重我哋兩個老人家，第一次見面就送我老公一支極名貴紅酒。平時我同佢（嘉穎）常用微信通信息，我湊緊孫又會打電話畀佢，佢又會即刻接，我哋冇隔膜！」 Connie大讚女婿：「鄭嘉穎結婚之後，我更加認識佢，佢以家庭為重，重到我要叫佢減啲，唔好咁誇張，佢成日問，兩個仔大咗會唔會夠錢用，驚住通貨膨脹，成日問老婆舒唔舒服，我話佢依家已經好好，佢話應該仲可以好啲，成日叫Grace唔好慳錢，要用就用！佢又會神神秘秘買個靚手袋送畀Grace，仲同Grace講『唔知點樣去多謝你，我真係好愛你！』佢 （嘉穎）對媽媽、家人甚至工人都好恩待，我以為佢係講嘢大聲嘅大男人，原來佢好細心 、好窩心、好體貼！我呢個女婿好似紅酒，初試一啖未開透，未飲出味道，一路飲一路開，味道會變化多端，愈來愈好，可能以後仲會有另外一個境界！我好愛佢，真係好愛佢，佢好抵錫！我畀佢101分，嗰一分係上帝額外加上去嘅。」
|
鍾意就快D Share啦！
|
|
|
