內地節目《奔跑吧》人氣高企，近日更開播最新一季，除了繼續有多位紅星擔任嘉賓外，最大亮點係喺最新一集，一班藝人因為熱到溶妝，驚現「真面目」！其中皮膚白滑嘅小鮮肉蔡徐坤甩妝後即變頹樣，而內地男星李晨亦油光滿面，跌Watt！至於小花白鹿，直情係「油頭油面」，連啲頭髮都出晒油！
惟獨女星Angelababy（楊穎）叫做冇完全失手，粉底只係輕微脫落，略見黑眼圈，算係未有走樣，唔知係咪見老公黃曉明之前拍《中餐廳》第4季時，熱到不單溶妝，直情變臉，雙眼冇神兼面腫腫，被網民瘋狂恥笑，所以Baby特別注意夏日妝容，精心打造風雨不改式嘅「不脫妝」。
此外，Baby亦喺社交網晒出拍攝節目嘅花絮照，見佢以孖辮妹造型示人，再綁上心形辮。32歲嘅佢即時「減齡」，少女感爆燈，網友大讚青春味十足，完全睇唔出已為人母，而「#Angelababy雙馬尾」話題亦引起網民熱議，成功登上熱搜榜，閱讀及討論量過億。憑條辮都有成億人討論，Baby真巴閉！
來源 source: http://hk.on.cc
|
鍾意就快D Share啦！
|
|
|
