「SIS樂印姊妹」成員駱胤鳴（烙印）於2019年12月27日在社交網宣布下嫁圈外男友「哈士彬」，原定於去年12月擺酒，可是遇上疫情及禁聚令而延期半年至昨晚（5月31日）舉行，喜宴上新娘子收到男家親友所送的8對龍鳳鈪及金鏈等賀禮，全身金光閃閃，擺酒前亦依足傳統有出門、行禮及簽婚書儀式。
新娘子接受訪問：「本身我哋想擺30圍，每枱12位賓客，但因為疫情，所以總共擺咗10幾圍，全部要隔開晒，有啲賓客都話咗唔嚟，好似我老公嘅電台舊同事林盛斌咁，佢就話嚟唔到飲喜酒，但好畀面嚟咗觀禮，Mayanne（麥美恩）好好，拍完劇趕嚟觀禮，仲帶埋靚相機幫我影相，仲要多謝男家送咗好多金器，不過擔心會壓扁，所以我成晚唔敢郁。」
她又說在疫情下結婚、擺酒，感覺所有事都要快：「啲賓客好早嚟到加快咗進程，影相、食埋嘢都晚上10點就可以好開咁離席，我12點就返到屋企，從來未試過飲喜酒可以咁早完場。」又話因為結婚過程好快，所以很多感動位都來不及開心，她又說：「我寫咗首歌畀老公，但因為過程太快，佢嚟唔切開心，依家睇番啲相，先醒起擺咗酒，有個結婚實在感。」不過她最難忘出門時，母親對她的祝福，又說：「媽媽好感動，因為第一次嫁女，我爬咗家姐頭，佢希望我幸福時，講講吓就眼濕濕。」還有要多謝天公作美，因為期間曾下大雨，幸好到露天草場行禮時天空放晴，直至婚宴完畢後也沒落雨，方便賓客回家。
問到是否最期待通關離港度蜜月？她直認好心急：「因為要用啲飛行里數換機票，碌咗卡唔好蝕嘛，通關不停延期令我好緊張，我要帶埋老爺，奶奶，我阿媽一齊去旅行，順便度蜜月。其實我哋喺2019年12月27日已經簽咗紙結婚，今次再做一次係想滿足啲老人家同親友，佢哋都催我哋快啲擺酒，唔好再延期。」
有份出席駱胤鳴婚宴的麥美恩，在社交平台全程直擊婚禮情況：「Congrats好感動，終於等到呢一刻，真係動魄驚心 ，大個女大個仔記住要錫老婆，如果唔係你就知咩事愛你們，張相很有愛。」她拍攝滿身金器的駱胤鳴，又新郎Kelvin笑說：「你老婆好墜手喎！」駱胤鳴即對鏡頭托一托胸。
來源 source: http://hk.on.cc
|
鍾意就快D Share啦！
|
|
|
