頭條獨家丨鼎爺講到明唔鬧得唔好玩 陳煒譚俊彦接棒鬥廚藝
李家鼎（鼎爺）與蕭秀香（三姐）於TVB的烹飪比賽節目《教煮爭霸》中鬥廚藝，稍後兩人將會休戰轉做監場官，交由「煮得之人」陳煒和譚俊彦互鬥，鼎爺與三姐只會從旁觀戰兼畀意見。向來坦白嘅鼎爺直言冇面俾，做得唔好照樣狠批，如果唔玩得就唔好上節目！ 採訪：方騫平 攝影：葉君海
鼎爺與三姐之前在節目中，分別以中秋團圓菜、蠔、雞蛋及白飯、金耳、雜魚等來展現功架，切磋過後宣告功成身退，交由陳煒和譚俊彦接棒，首場以時令蟹做題材考驗兩人廚藝，鼎爺與三姐只係隔岸觀火。鼎爺形容新安排好有新鮮感；三姐話可以從中學吓煮新派菜。
三姐做到老學到老
作為監場官嘅鼎爺強調好有要求，「試食完後係好就好，唔好就唔好，我會好老實話佢哋聽，同埋要加減啲乜較好，有乜手法及步驟出錯…(唔怕尷尬咩？)我好坦白㗎！接受唔到唔好玩呢啲節目，不如返屋企自己煮！如果唔好我勉強話係好，對唔住佢亦對唔住自己，所以唔好咁樣害人。」三姐知道鼎爺好坦白，其實都想對方有進步，要做到老學到老。另外，TVB大搞《男神廚房》，鼎爺同意要做多啲飲食節目：「唔怕得罪講句，有啲人貪口爽包拗頸，餸菜係有好多變化，就算係炒冷飯都要睇吓炒得好唔好先？要觀其色、聞其味、品其香，唔係放條菜入即食麵度就叫會煮食。」
本文作轉載及備份之用 來源 source: http://hd.stheadline.com
|
鍾意就快D Share啦！
|
|
|
