關心妍邀20年前緋聞男友做嘉賓 蕭正楠讚Jade冇變過
關心妍（Jade）一連兩場的《關心妍 Jade Kwan 約20週年演唱會》昨晚於紅館開鑼，除老公楊長智及囡囡心心外，一眾圈中人羅傑承、蔡一智、蔡一傑、施南生、譚嘉儀等等亦有到場支持，而後台亦佈滿花籃為Jade打氣。
晚上8時20分左右，Jade身穿銀色閃裙現身，兩側高衩大騷美腿艷壓全場，苦候多年的歌迷用熱烈的掌聲支持偶像，見到Fans的熱情，她也忍不住眼濕濕。Jade一口氣唱出多首金曲，包括《負擔不起》、《龐背21世紀》、《優先訂座》等等，她台上表示極速籌備今次個唱充滿挑戰，但仍以最佳狀態完成與歌迷的約會：「今次演唱會主題叫做約，約係一個信念，一份堅持，一個盼望。好耐以前上帝用彩虹與人立約。我哋世界好紛亂但我哋要有盼望，抬頭望天空就知道上帝睇住我哋，就算幾大雨都好，雨後一定會有陽光。雖然呢個演唱會好急，好驚心動魄，但係我帶住一份Mission，一份堅持同信念，希望今日每一個你都有一個愉快嘅晚上。我特別珍惜呢次演唱會，雖然呢次演唱會比我之前任何一個演唱會都艱難，但今日見到你哋每一個我覺得好值得。」
今次Jade狀態十足，除了獻唱金曲外，更騷她的音樂才華，一時自彈自唱鋼琴，更從台頂吊下色士風演奏。而囡囡心心亦擔任個歌嘉賓，母女檔合唱《SMILE》令樂迷非常興奮。不過當囡囡心心上台打筋抖時，Jade就顯得緊張：「我多謝天父帶咗呢位小天使比我，楊榮心我等咗你好耐聽講你想喺紅館打筋斗，今日終於願望成真啦？你使唔使拉吓筋先？得唔得㗎？」
這晚Jade一共演繹近30首歌，當唱出歌迷點唱的「Side Track」時，歌迷和唱氣氛非常熱鬧，她亦不時換衫，穿上一條全人手刺繡藍天白雲圖案的高級訂造服，每條長裙價值6位數！當Jade「重著」二十年前「戰衣」亦勾起Fans回憶，而她穿上數米高的長裙，吊至舞台的高空，歌迷都肉緊大叫「小心啲啊」！當Jade演唱《原諒的力量》時，她多謝媽媽的養育之恩，亦罕有談及對爸爸的感覺：「舊時我都好嬲佢，點解要走咗去，但後來我都放低咗去見翻佢，但係好快佢就離開咗。我唔知佢有冇睇過我嘅演唱會，因為我冇邀請過佢，但今晚我想送呢首歌比佢聽。」
頭場演唱會邀請曾傳緋聞的蕭正楠做嘉賓，二人十多年未有同台演唱，當蕭正楠現身時全場尖叫成為個唱高潮之一。二人剛出道時，曾經因為合唱《特別鳴謝》而傳出緋聞，其後又傳鬧不和；多年過去，蕭正楠與Jade都找到屬於自己的幸福，昨晚二人在台上再唱《特別鳴謝》，蕭正楠即想當年：「嘩！真係好多年好多年都冇唱呢首歌，好多朋友都喺K房唱呢首歌『炒車』，諗翻當年拍MV，發現Jade咁多年都冇變過，大家要比多啲掌聲Jade，真係眨吓眼原來過得咁快，多謝Jade邀請，比我有機會再喺紅館度體驗。」而Jade就話見到蕭正楠即刻青春晒：「好多Fans都話叫我搵翻原唱出嚟，終於請到蕭正楠嚟啦，大家開唔開心啊！」直到演唱會尾聲演唱《關心...心妍》，Jade忍不住落淚，歌迷紛紛高呼「唔好喊啊！」。
更多新冠疫情資訊，請到以下專頁瀏覽按此
立即下載｜全新《星島頭條》APP：https://bit.ly/3yLrgYZ
|
鍾意就快D Share啦！
|
|
|
