近日柬埔寨、泰國等地的「賣豬仔」騙案愈揭愈多，震驚全城！剛由泰國度假返港的《3日2夜》女神陳詩欣，自揭在曼谷收到「打工」訊息，感到膽戰心驚；在馬、泰開工的網紅李蔓瑩亦心驚驚，堅持絕不單獨行事，全程採取「黐實」政策。
女神陳詩欣早前孖老公到泰國曼谷旅遊，在當地逗留8日，回港隔離期間，她與Fans分享旅遊經歷，大爆曾被邀約「打工」，更公開對方的訊息：「看到您在泰國曼谷，有沒有興趣在泰國曼谷打工……或是有客人想去消費也可以介紹給我的，謝謝！」明顯是關注其社交網後向她埋手！昨日她受訪時說：「我嗰日喺夜市Po咗食嘢相，有個陌生台灣女仔私訊我，我睇到佢嘅社交帳號，所以知佢係台灣人，我仲畀朋友睇，講笑話去曼谷仲有得打工。」
唔敢再實時打卡
當時還未爆出網騙及逼做黑市勞工等新聞，故她未有為意，還以此開玩笑，直至行程最後2日，「賣豬仔」新聞愈爆愈多，家人及朋友不停傳短訊叮囑她小心，她才想起收過邀約「打工」訊息，自此不敢再實時打卡曝露行蹤：「因為太多新聞，又話去泰國旅行畀人捉走，我唔肯定嗰個台灣女仔係咪報道所指都係被呃嗰個，我都擔心佢，但做唔到任何嘢幫佢，最後連佢個社交帳號都搵唔到，又諗番起我會唔會成為咗目標，嗰下真係有啲心寒。」
詩欣表示此行最初都覺得安全，反而搭飛機返港時開始驚，因為見到很多失蹤及求助個案的報道：「覺得我好好彩，冇發生任何事。」抵港後，不少朋友問她意見，當中有人一家大細買了機票：「我答唔到佢哋，個案愈嚟愈多，又搵唔番又失聯，叫佢哋自己衡量。」
朋友問私隱證身份
另一邊廂，上星期出發到馬來西亞拍攝旅遊節目的網紅李蔓瑩，每日向家人報平安，她透露已完成檳城拍攝，現身在怡保：「唔覺得有咩特別可疑，可能我哋成Team人好少行街。我哋由檳城開始就包車拍攝，每日都係點對點，拍完就返酒店，都幾安全。」她出發當日已爆出「賣豬仔」新聞，所以家人與朋友都提醒她小心：「屋企人特別開個聯絡群組，每日我都影相報平安，朋友一得閒就短訊問我啲特別問題，譬如我隻貓叫咩名，去證明我係李蔓瑩，而唔係被人盜用咗電話。」
Fans更好有心，叫李蔓瑩傳暗號證明安全，為派定心丸，她密密出Po報平安：「我會小心，全程黐實團隊，有時攰得滯連晚飯都唔食，佢哋會先車我返酒店，我返到房鎖門就唔會再出去。後日出發去泰國拍攝，嗰度多夜市同市集，到時會更小心，我一定黐住佢哋行，堅持唔會單獨行動！」
沙律分享妙計 「甲組腳」擊退相睇騙徒
騙徒手法層出不窮，除了「賣豬仔」騙案外，又爆出相睇電騙，騙徒認親認戚，自稱透過婚姻介紹所聯絡相睇，瞄準一眾「寂寞的心」。回復單身的性感女神張沛樂（沙律）表示，很久以前亦收過一些網騙或電騙訊息，但未遇過「相睇」騙徒，反而有朋友收過相關訊息，她笑說：「我朋友話收過類似嘅嘢，話咩阿姨介紹相親，我朋友影咗張甲組腳嘅相畀對方睇，問人介唔介意，然後對方就收咗皮！」
至於一家3口移居泰國曼谷的藝人羅敏莊亦有留意新聞，但揚言生活如常：「冇香港啲新聞講到咁恐怖，我啲泰國朋友連呢單新聞都冇聽過。」她安撫擔心她的朋友，指現時生活愉快，活動範圍只是鬧市的商場及食肆，不會去偏遠地方，加上她不用搵工，更不需要網上情緣，所以不會受騙。
而「泰國通」胡慧沖寄語大家考慮自己的情況，才決定是否前往當地，又提供安全貼士：「泰國冇Uber，我哋係用Grab，大家上車後要影低司機Number再Send畀朋友，叫佢哋隔15或20分鐘後搵你，以確保安全。如果有事發生，可以打Tourist Police（旅客警察熱線，能以英語溝通），電話係1155，最後要學識叫救命嘅泰文係『吹堆』，必要時喺人多嘅地方求救！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
