藝人陳敏之每日都會做柴可夫，揸車接送囝囝返學，日前佢送完囝囝返學，咁啱見到有學生賣旗籌款，佢就將車停低諗住日行一善支持吓，敏之喺社交網上載片段同留言：「一早起身送完仔仔返學，見到一班師弟師妹在街上賣旗籌款，身為師姐嘅我就梗係要支持下佢哋，呢位師妹好醒目又得意，你哋加油，籌多啲款。」原來咁啱遇到師弟師妹，敏之仲絞低車窗同小師妹傾咗幾句，讀緊小學嘅小師妹精靈又有禮貌，十分可愛，敏之買旗後叫小師妹幫佢貼喺手臂，又祝小師妹加油同學業進步，小師妹就好有禮貌咁講咗句多謝。
圈中好友袁偉豪同陳自瑤即畀心心兼讚小師妹可愛，不過亦有網友留言質問：「應該戴番個口罩保護其他人」、「點解唔戴番好個口罩落車買旗」，更加有網民畀晒嬲留言：「唔戴口罩，有冇諗過小朋友好危險？你自己都有小朋友，點樣可以連最基本嘅衞生意識都冇」。敏之就留言解釋當時喺自己架車入邊冇為意，亦承諾下次會記得戴番口罩。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
