9月1日開學日因遇上蘇拉颱風襲港，所以改咗喺今日（4日）先正式開學，唔少圈中父母都有送小朋友返學，仲喺社交網紀錄低小朋友成長時刻添！啱啱開完演唱會嘅天后容祖兒，雖然佢未結婚未有小朋友，不過佢今日就趁住得閒，送姪女返學，以露腰上陣嘅佢，全程拖實姪女行返學校，非常溫馨！
其實祖兒弟弟Samuel喺2019年同空姐女友Samantha奉子成婚，榮升做姑媽嘅祖兒，除咗送咗層樓畀弟弟之外，仲包辦一對新人20圍的酒席，同年11月姪女Sophia出世，祖兒好錫姪女，一有時間就會接姪女放學，之前試過喺中秋節陪姪女玩燈籠，留言：「我希望任何佳節都可以一家人度過，看着小朋友一天一天長大，期盼健康純真快樂，一直能夠陪伴着她到老。」
出名係廿四孝爸爸嘅黃長興送仔女返學時，幫小朋友孭書包，興奮到彈起！車婉婉孖老公一齊送6歲兒子BBQ返學，一家三口喺學校門口影全家福。而黃心穎家姐黃心妙就孖老公送3個仔女返學，仲一家五口玩自拍添！名模蔣怡就同一對仔女搭港鐵返學，仲喺學校門口抱住兒子自拍，好Warm呀！
王祖藍同太太李亞男育有2女，近年祖藍長駐內地發展，舉家移居上海，今日祖藍喺社交網晒咗條送2女返學嘅片，睇到4歲大女Gabby同妹妹Hayley個樣好唔想返學囉，相當可愛又搞笑！今次係細女Hayley首次入學，佢聽到返學後爸爸媽媽都唔喺身邊，要自己一個，要等到放學後先可以見到爸爸媽媽，佢即刻一面呆滯，諗住陣先話好，唔少網友都有同佢打氣呀！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
