▲《神耆小子》
鄭則士、冼靖峰、蕭正楠、樊亦敏、曹永廉、傅嘉莉、羅毓儀主演的TVB劇《神耆小子》在昨晚（5月7日）播出的第2集，講錢大海（鄭則士飾）被綁架後因交通意外僥倖脫險，並以100萬利誘碰巧路過現場的趙一鳴（冼靖峰飾）協助調查其家人是否如兩名綁匪所言是策劃事件的真兇。
經過一輪「講價」，二人以158萬達成協議，一鳴帶大海回家製造大海失蹤假象方便查出真相。豈料，一鳴爸爸趙子勇（蕭正楠飾）原來與大海有積怨，子勇懷疑大海是當年指示人打斷他雙腳的幕後黑手，雙方一見面即爆發激烈衝突。
另邊廂，大海情人洪玫瑰（樊亦敏飾）及兒子繼來（曹永廉飾）在綁架事件中均相當有可疑。
神耆小子丨樊亦敏首集換足8個造型顯身價 蕭正楠演正骨師傅似模似樣
舌戰式對壘夠火花
昨晚《神耆小子》內容雖以查案為主，但爆笑位相當多，無論是冼靖峰（Archie）與鄭則士（Kent哥）的棟篤笑式一唱一和，或是蕭正楠（Edwin）、Archie與Kent哥的舌戰式對壘均火花十足。
Archie在演戲方面雖然還是新丁，但喜劇節奏意外地好，其中夾在Kent哥與Edwin之間進行談判的場口，Archie不時以主持式口脗說出「咁你有咩回應？」、「冷靜啲呢位先生」等持平說話；配以Edwin變化豐富的搞笑式嬲怒表情，及與Kent哥句句有骨的互寸對白：「正所謂仙女下凡塵，點可以搵個普通人，仲要係個流氓」、「咩叫有啲乞人憎，係非常乞人憎」等，大大增加觀看性，難怪網民正評夠搞笑，還大讚Archie以新人來說演繹相當自然。
網民紛紛留言指：「好睇喎，肥猫演技100分爆分」、「喺蕭正楠屋企嗰場笑C」、「Kent哥喜劇感一流」、「Archie雖然唔靚仔，但第一次拍劇又咁重戲份表現都幾好」、「初初拍劇仲要咁重戲份算係咁啦」、「我都覺佢做得好好，聽講鄭則士教佢好多嘢。」
Kent哥即場爆肚建功
另外，Edwin與Archie在劇中飾演兩父子，網民更分為支持派及反對派，支持派認為以阿蕭真實年齡，絕對能升任飾演Archie父親；反對派則普遍認為Edwin保養得宜，與Archie雖有「父子相」，但感覺似兄弟更勝父子。還有網民發揮創意謂：「會唔會其實係養父？」對劇情後續發展充滿期待。
據知劇集對白之所以如此啜核，除是編劇功力，亦是主角Kent哥即場爆肚功勞。Edwin受訪時坦言與Kent哥對戲雖然很好玩，但腦袋絕不能鬆懈：「熟讀劇本係首要，但係腦筋都要轉得快，因為好多對白Kent 哥都會用自己嘅方式去演繹，唔一定完全同劇本一樣。加上我同Kent哥劇入面係冤家，好多時大家會度啲啜核嘢去鬧對方同糟質對方，成件事感覺好似邊拍戲邊玩，都好開心。」
對白相隔3日依然爛熟
另一場Archie與Kent哥咬耳仔討論調查進度的場口亦相當抵死，二人不但連環咬了六轉耳仔，更兩度幾乎「面貼面」，配以Kent哥及Archie一個若無奇事、一個奇尷無比的演繹，相當爆笑。
Archie受訪時透露該場拍攝相當難忘：「因為Kent哥想做到一shot落嘅效果，但我第1日唔係好get到應該點演，所以我哋最後都要分shot拍。我哋之後都因為拍唔到想要嘅效果好唔開心，好彩後尾因為under咗有機會畀我哋補拍，我哋真係10分鐘內搞掂咗個一shot落，仲要兩次就搞掂咗。雖然隔咗成3日先再拍，但我哋竟然都冇唔記得對白，呢件事真係好有滿足感。」
HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m
追蹤TOPick Whatsapp頻道睇最新資訊︰http://tinyurl.com/3dtnw8f5
|
鍾意就快D Share啦！
|
|
|
