美斯甩底明星賽引起爭議。
阿根廷「球王」美斯同國際邁亞密嘅合約年底完結，未來去向再惹猜測，近日驚傳呢位38歲巨星考慮重返歐洲，為老友法比加斯執教嘅科木助陣，美斯老婆日前更現身科木熱身賽，為傳聞再添熱度。美斯原定周四(24日)為美職明星隊上陣，但開波前無故甩底，面臨停賽處分。
美斯同法比加斯喺巴塞隆拿做隊友嗰陣，已經情同手足，兩家人經常結伴出遊。法比加斯2年前接掌科木，表現大獲好評，今夏大展拳腳斥1.14億歐元簽入9個新兵，科木日前同里爾踢熱身賽，美斯老婆洛古絲素就喺看台現身，同法比加斯老婆Daniella Semaan一齊睇波。
意大利傳媒報道，美斯如選擇離開美職，為老友法比加斯效力係選擇之一，而且科莫本身居住環境極佳，適合美斯家人居住。法比加斯被傳媒追訪簽美斯嘅可能性，佢就回應：「美斯加盟科木？冇嘢係冇可能。佢哋嚟度假住喺我屋企，我哋老婆同細路都好親密，不過美斯依家喺美國。」
美斯早前獲球迷投票選入美職明星隊，原定周四對墨超明星隊上陣，但開波前國際邁亞密突然宣布，美斯同佐迪艾巴都唔會參賽，無緣同沙治奧拉莫斯帶領嘅墨超明星隊交鋒。國際邁亞密教練馬斯真蘭奴日前表示：「我想美斯可以休息，但決定權唔喺我手上。」
美斯「甩底」引起美國球迷不滿，批評佢唔係真係幫助美職發展，亦辜負所有投票選佢入隊嘅球迷，據報美職賽會亦準備國際邁亞密交涉，有機會罰美斯同佐迪艾巴停賽1場。碧咸、亨利、卡卡等名將過去都曾踢美職明星隊，對上一次有巨星甩底係2018年嘅伊巴謙莫域，佢事後亦被罰停賽1場。
本文作轉載及備份之用 來源 source: http://hk.on.cc
|
鍾意就快D Share啦！
|
|
|